Por Galicia Confidencial | A Estrada | 07/07/2017 | Actualizada ás 14:00
O Concello da Estrada organizou onte un pleno para tratar a situación de Carlos Faílde. Como desvelou GC, este cargo do PP local e coordinador de Protección Civil factúralle regularmente a varias administracións, incluído o Concello para o que traballa, a través das empresas nas que é directivo, Emersafe e Ricarsat.
O edil José López tratou de convencer á oposición de que non hai nada irregular nisto. Tras dúas horas de debate; PSOE, BNG e Móvete seguen pedindo unha comisión de investigación e o cese de Faílde no cargo.
López sacouse da manga a última hora unha petición do traballador público solicitando compatibilidade, datada en 2013. Daquela Faílde era só responsable de tendas de Electrónica Ricardo, segundo o seu Linkedin.
Agora é administrador único e propietario doutra empresa, Ricarsat, e apoderado dunha terceira, Emersafe, coas que factura ao Concello, Vicepresidencia da Xunta, Axencia Galega de Emerxencias, etc.. O edil entende que o silencio administrativo - o Concello non respondeu en 2013-, ampara a Faílde; malia que por norma xeral o feito que unha Administración non conteste a unha petición implica que non se concedeu o solicitado.
Ademais, en Emersafe Carlos Faíde é apoderado e a súa muller administradora única, segundo o Rexistro Mercantil. Emersafe ten o domicilio social nun ático, no que segundo dúas fontes locais diferentes, tivo o matrimonio un dos seus domicilios. No mesmo portal está a sede do PP local, con carteis de Rajoy nas ventás, segundo veciños da vila.
Segundo o resume contable facilitado polos funcionarios do Concello á oposición, ao que tivo acceso GC, Emersafe facturou ao municipio no que traballa Faílde só un mes despois da creación a empresa. A empresa creouse en novembro, comezou a facturar ao concello en decembro. Foron máis de 5.900 euros por, entre outras cousas, material de rescate en montaña. É dicir, material de emerxencias.
En 2015, Emersafe facturoulle ao Concello 2.800 euros por, entre outros motivos, a reparación dun vehículo de emerxencias, un camión de incendios.
Non consta que Emersafe sexa titular de ningún taller. Ricarsat si ten un taller, nun polígono en Santiago. A actividade de Emersafe, segundo o Rexistro Mercantil, son os aparatos eléctricos e de telecomunicacións, nada relacionado co material de emerxencias ou a reparación de vehículos.
En definitiva, Emersafe factúralle regularmente material de emerxencias ao Concello; unha área, emerxencias, na que o coordinador municipal é, precisamente, o apoderado de Emersafe e marido da administradora única.
Segundo a oposición, é o propio Faílde quen, como coordinador de Protección Civil, firma a conformidade do material que lle entrega os provedores.
Por outra banda, cando GC desvelou as contratas das empresas de Faílde coa Xunta, a oposición publicou as facturas que tiña co seu Concello e pediu o seu cese. O alcalde respondeu alegando que non o podía cesalo, pois o cargo non existía formalmente.
«Non é un cargo político, e non podo cesalo porque non hai nada: non existe ese posto na RPT, non existe un coordinador de Emerxencias. Eu pedinlle que coordinase o grupo, que fixera os cuadrantes», dixera en declaracións a La Voz.
Sen embargo, Pérez presentou onte, tamén a última hora , un documento que contradí a súa propia versión inicial. Neste decreto o alcalde nomeaba formalmente a Faílde coordinador de emerxencias. É dicir, o alcalde mentiu, o coordinador de Emerxencias si existe, porque el mesmo o nomeu por decreto.
O edil asinou o decreto o 13 de xuño de 2011, só dous días despois de chegar ao cargo. É dicir, nomeou ao seu compañeiro na directiva local do Partido Popular coordinador do Servizo Municipal de Protección Civil antes incluso de designar os concelleiros do seu goberno.
Tal e como asinou ese decreto para nomealo, López podería asinar outro para cesalo, como lle pide a oposición. Non o fará, polo de agora, argumentando que todo é unha cacería política e un xuízo sumarísimo por ser Faílde do PP. Certo é que o empresario/traballador público xoga un papel moi importante nos conservadores, por exemplo fixo de chofer do alcalde na súa xira polos colexios electorais nos últimos comicios.
López abriu a porta, iso si, a incoar un expediente informativo ao traballador público no caso de que as explicacións de onte non lle parezan dabondo á oposición. Dixo que convocaría outra comisión informativa para analizar o caso.
Por outra banda, o CSIF sacou un comunicado defendendo a posición do alcalde e de Faílde. Responde así este sindicato a Comisións Obreiras e UGT. Estas dúas centrais denunciaron que Faílde non pisa a base de Protección Civil, malia ser o seu coordinador.
Dende 2010, Emersafe e Ricarsat facturáronlle ao Concello da Estrada máis de 157.000 euros, con este desglose:
RICARSAT
2010 24.924,67 €
2011 44.752,88 €
2012 31.422,10 €
2013 41.038,93 €
2014 5.332,11 €
2015
2016
2017
147.470,69 €
EMERSAFE
2013 6.621,97 €
2015 2.881,96 €
9.503,93 €
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.