Galicia entra no gran foro dos liberais europeos
A Asociación Galega para a Liberdade e a Democracia (GALIDEM) acaba de entrar a formar parte do European Liberal Forum (ELF). Galidem organizará unha xuntanza internacional en 2012, na que participará Converxencia XXI e un dos partidos integrados no Bloque.
Por Galicia Confidencial | Santiago | 06/10/2010 | Actualizada ás 22:20
GALIDEM é a primeira asociación galega que entra a formar parte deste clube que engloba asociacións liberais de toda Europa. Do European Liberal Forum forman parte os Think Tanks dos máis poderosos partidos liberais europeos, desde o Partido Liberal-Demócrata británico, actualmente no goberno de coalición cos conservadores, até o Partido Liberal alemán.
O ingreso da GALIDEM no ELF foi avalado polo Movimento Liberal Social portugués e a Fundació Catalunya i Democracia e fíxose efectivo na asamblea que este foro celebrou en Bruxelas o pasado 1 de outubro.
"Espallar os valores liberais"
"O ingreso da GALIDEM no ELF é moi positivo tanto polo recoñecemento internacional que isto supón para o noso país e os ideais galeguistas como pola oportunidade que ofrece para espallar en Galicia os valores liberais", apuntou o seu presidente, Fernando del Río, a Galicia Confidencial.
A GALIDEM é un Think Tank que ten por obxectivo analizar e propor solucións aos diversos retos que confronta a sociedade galega actual, "sempre desde unha perspectiva liberal e galeguista".
Cumio dos liberais europeos
Esta asociación organizará o cumio liberal ibérico de 2012. Un evento no que tamén colaborarán Converxencia XXI e o PNG-PG, formación que forma parte do BNG.
