SANTIAGO DE COMPOSTELA | 14/09/2017 | Actualizada ás 16:23 por EUROPA PRESS
O presidente da Xunta, Alberto Núñez Feijóo, recoñeceu que a decisión da Mesa do Congreso de volver vetar o debate sobre a transferencia da Autoestrada do Atlántico (AP-9) a Galicia non lle supón "unha sorpresa" e asegurou que, a pesar das reiteradas negativas do Goberno central, seguirá demandando a transferencia.
"Xa sabiamos que o grupo que apoia ao Goberno non está de acordo con esta transferencia como non o estiveron outros. Non hai ningunha novidade nin ningunha sorpresa", manifestou o xefe do Executivo autonómico, ao termo da reunión semanal do Consello da Xunta.
Contrapuxo que o que si constitúe "unha novidade" é que "a prioridade" da Xunta sexa "eximir aos galegos" de pagar con fondos da comunidade as bonificacións das peaxes de Rande e A Barcala, que asumirá o Goberno central.
"É unha novidade que aprobou o Consello de Ministros e espero, nos próximos meses ou semanas, concretar definitivamente un acordo que suporá un aforro para a comunidade", remarcou Feijóo.
"NON IMOS A CAMBIAR DE OPINIÓN"
Feijóo subliñou que lograr que Galicia deixe de pagar "algo que non é" dos galegos --en alusión ás bonificacións das peaxes-- é xa "un obxectivo conseguido", pero recoñeceu que falta o traspaso. "Son os dous ítems, conseguimos o primeiro de momento", incidiu, antes de engadir que "a lexislatura aínda non terminou".
A continuación, asegurou que continuará polo "camiño" iniciado e seguirá demandando a transferencia da AP-9. "Non imos cambiar de opinión porque é unha opinión referendada nas urnas e, mentres non consigamos a transferencia da AP-9, seguirémola demandando de forma clara", resolveu.
NOVO VETO AO DEBATE
A Mesa do Congreso acordou de novo que non procede a toma en consideración polo pleno da proposición de lei orgánica de transferencia da titularidade e das competencias da autoestrada AP-9 a Galicia, presentada polo Parlamento autonómico.
A decisión foi adoptada na reunión da Mesa do pasado martes 5 de setembro, e remitida este xoves (nove días despois) á Cámara galega.
Nunha resolución que asina a presidenta da Cámara Baixa e deputada do PP por Pontevedra, Ana Pastor, a Mesa rexeita que se tome en consideración polo pleno a citada proposición de lei "expresada polo Goberno a súa desconformidade".
De feito, establece que, "de acordo co criterio incluído" no informe que elaborou no seu día o Ministerio de Fomento, "a aprobación desta proposición de lei suporía un aumento dos créditos orzamentarios". Foi por isto polo que o Goberno non prestou a súa conformidade para a súa tramitación, "en virtude do disposto no apartado sexto do artigo 134 da Constitución".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.