Anova non se deixa amedrentar e fará actos a favor do referendo
O portavoz nacional de Anova, Antón Sánchez, acusou ao delegado do Goberno en Galicia, Santiago Villanueva, de actuar de "censor" e insistiu na necesidade de promover actos "en defensa da democracia" e do referendo que a Generalitat prevé levar a cabo o 1 de outubro.
- O Goberno advirte a Anova que non autorizará actos “contra a legalidade”
- Alcaldes do BNG trasladan o seu apoio aos rexedores cataláns que defenden o referendo
- O conselleiro delegado do Sabadell avoga por unha "solución política" e pide "respecto á legalidade"
Por E.P. | SANTIAGO DE COMPOSTELA | 15/09/2017 | Actualizada ás 17:55
O líder da formación nacionalista replicou a través dun vídeo colgado nas redes sociais de Anova ás declaracións nas que Villanueva asegurou este venres que, "como en todos os casos, as manifestacións ou reunións que se convoquen en contra da legalidade non serán autorizadas".
Para Antón Sánchez, as palabras do delegado do Goberno "confirman" a denuncia realizada por Anova nos últimos días. "Estamos nun estado de excepción non declarado", volveu a criticar.
"Desde cando se suspenderon os dereitos fundamentais de liberdade de expresión e de reunión neste país para que vostedes preventivamente actúen de censores e inquisidores contra quen opine politicamente sobre un asunto que a todos nos compete?", preguntou o tamén viceportavoz parlamentario de En Marea.
Fronte a iso, avisou de que "non conseguirán" paralos en "unha loita pola democracia" que, na súa opinión, "vai máis aló dos límites de Cataluña". "Estamos interpelados todos os que queremos loitar pola democracia neste pías, fronte a un franquismo sen Franco", asegurou para insistir na necesidade de "participar e promover actos" en defensa da democracia.
