Villoslada carga contra Leiceaga, a quen ve como a “aposta do PP”

O deputado do PSdeG Juan Díaz Villoslada, un dos candidatos ás primarias, criticou este luns con dureza o pacto subscrito entre Xoaquín Fernández Leiceaga e Gonzalo Caballero para liderar de forma conxunta o partido e, fundamentalmente, cargou contra o actual portavoz parlamentario, a quen ve "a aposta do PP".

"Apelo aos que avalaron a Leiceaga a que voten libremente, porque os avais non son un cheque en branco", recalcou Villoslada, quen insistiu en que ese acordo é "unha absoluta incoherencia" e "un engano á militancia".

Ademais, lamentou que "se sigan os ditados do PP" ao perfilar unha candidatura cun secretario xeral "que non está no Parlamento" e unha portavocía exercida pola persoa pola que "aposta máis" o PPdeG, en palabras do seu secretario xeral, Miguel Tellado.

En paralelo, o ourensán afincado na Coruña reprobou que o pacto se alumase este domingo, co que "estaba a ocorrer en Cataluña, e en todo o país", en referencia aos altercados que se sucederon na xornada prevista para a consulta.

De igual modo, comparou esa unión co Comité Federal de hai xusto un ano, que terminou coa dimisión de Pedro Sánchez e a constitución dunha xestora para liderar o partido. "Temos que loitar contra esas vellas prácticas; a vella garda non pode estar a actuar desta forma outra vez", sentenciou.

E se Gonzalo Caballero sostivo publicamente que a candidatura de Villoslada está "deseñada polas baronías", este replicou que tanto o vigués como o noiés "levan máis de vinte anos" na política.

"Non sei se como baronías, marquesados ou condados, non me meto nesa linguaxe, pero realmente son os que levan vinte anos traballando nesas formas de facer", remachou, en alusión a "mesas padiola" e a "pés no braseiro".

"CADA DÍA MÁIS FORTE"

Cuestionado acerca de se esta unión —que Caballero comparou coa oferta que Pedro Sánchez fixo a Patxi López para concorrer contra Susana Díaz nas primarias federais— lle deixa sen opcións de cara á votación do domingo, o parlamentario autonómico asegurou que se sente "cada día máis forte".

"Non se se é así, pero se teñen que xuntar forzas, igual é que senten certas debilidades. Sobre todo o que se retira", interpretou, antes de subliñar que lle "chama a atención" que Leiceaga dese este paso despois de pedirlle a el que abandonase a carreira.

"Son cousas de trastenda que non se entenden", proseguiu, antes de volver requirir que se "clarifiquen ao máximo" os acordos para que os militantes coñezan o seu contido. Sobre todo porque, desde o seu punto de vista, esta alianza non é "a forma de respectar un proceso de tanta democracia interna como as primarias".

DIVISIÓN NO GRUPO PARLAMENTARIO?

Finalmente, preguntado sobre se esta situación derivará na división do grupo parlamentario do PSdeG, quen fora xerente da Universidade da Coruña entendeu que "non ten por que".

Pódese, como dixo, "abrir unha paréntese" para facer "un traballo cohesionado" no Hórreo e, a continuación, "pechar paréntese" para continuar coas primarias. "Somos capaces de distinguir os procesos e as institucións", finalizou.