Por Alberto Quian | O Grove | 09/10/2017 | Actualizada ás 12:16
As augas galegas non deixan de sorprender aos científicos nos últimos tempos. Logo dos sorprendentes avistamentos de baleas azuis nas semanas pasadas, agora un equipo do Bottlenose Dolphin Research Institute (BDRI) volve aportar imaxes excepcionais, únicas no mundo, dun exemplar de rorcual común (Balaenoptera physalus) con vitilixe, unha afección cutánea que se caracteriza pola presenza de manchas brancas sen pigmento, rodeadas dun bordo de cor normal ou máis escura.
As imaxes foron gravadas o pasado 7 de outubro, nunha das saídas do BDRI para o avistamento e rexistro de distintas especies nas augas galegas. Durante a travesía, os científicos identificaron un rorcual "extremadamente raro con vitilixe".
"Polo que sabemos, esta é a primeira balea de aleta con vitilixe gravada e filmada no mundo", anunciaron dende o BDRI.
TARTARUGA XIGANTE
Durante a mesma xornada de investigación de campo houbo outra gran sorpresa: o avistamento dun exemplar de tartaruga mariña de coiro (Dermochelys coriacea), a máis grande das tartarugas no planeta.
Tamén houbo outros avistamentos sorprendentes dunha balea de aleta nova alimentándose na superficie, centos de golfiños comúns, decenas de toniñas comúns e un grupo de arroaces que seguiu ao equipo do BDRI até o porto.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.