En Marea ve os incendios "un síntoma" de que "o territorio está enfermo" e chama a "un cambio de modelo"

O portavoz de En Marea, Luís Villares, reflexionou este xoves sobre que os incendios son "un síntoma" de que "o territorio está enfermo", de modo que avogou por "un cambio de modelo" que permita reverter "esa enfermidade".

En declaracións aos medios tras unha visita ás zonas afectadas en Cervantes (Lugo), o portavoz da formación rupturista reclamou a aprobación "inmediata" dunha orde de "axudas especiais" tanto para a xente que perdeu a súa vivenda como para aqueles que perderon o seu negocio ou o seu "medio de vida".

Así mesmo, co foco posto no aspecto ecolóxico, demandou axudas para as comunidades de montes que permitan "recuperar" as zonas devastadas polo lume xunto cun "plan de choque" que evite que a escorrentía contamine os ríos e as rías.

En paralelo, o maxistrado en excedencia á fronte de En Marea solicitou á Xunta que abra oficinas "preto" do territorio afectado polos incendios, a fin de que os cidadáns non teñan que facer "longos desprazamentos" para recibir información ou solicitar as axudas "de forma rápida e sinxela".

CAMBIO DE MODELO

Ademais, Villares remarcou que a situación xerada cos incendios dos últimos días ten que dar lugar a un debate sobre un "cambio de modelo" e a "un gran pacto polo territorio".

Ao seu xuízo, a xente debe poder "vivir con servizos públicos e con dignidade" tamén no medio rural e nas zonas periurbanas, onde pode "xerar riqueza ambiental e económica" traballando a terra ou atendendo unha explotación.

"Un rural vivo é fonte de riqueza e, ben coidado e xestionado, dificulta a existencia de incendios", razoou, partidario de deseñar "un plan" que permita "reverter" o modelo actual.