Alumnos galegos realizarán visitas conxuntas á Xunta e ao Parlamento, que asumirán o custo dos desprazamentos

O presidente do Parlamento, Miguel Santalices, e o conselleiro de Educación, Román Rodríguez, asinaron este luns un convenio de colaboración que permitirá organizar visitas guiadas conxuntas ás sedes do poder Lexislativo e do Executivo galego co fin de que os alumnos poidan coñecer de primeira man o seu funcionamento.

Con este programa, denominado 'Coñece as túas institucións' e dirixido inicialmente ao alumnado de 5º e 6º de Primaria, e 1º e 2º de ESO, aspírase a que os estudantes coñezan as institucións e comprendan a separación de poderes propia da democracia, unha separación que, segundo Santalices, "ás veces resulta confusa para a cidadanía".

Aínda que agora a Cámara xa recibía visitas cun programa que "funciona razoablemente ben" --pechará este ano con máis de 12.000 participantes--, Santalices deu por feito que este convenio favorecerá que aumenten. E é que, no caso dos estudantes, Xunta e Parlamento pasarán a asumir o custo dos desprazamentos.

Nunha mesma xornada, cada grupo de alumnos poderá visitar as dependencias do Lexislativo e do Executivo, e, en palabras do conselleiro, o programa suporá "unha oportunidade para a aprendizaxe histórica, para a reflexión e para o pensamento crítico".

Román Rodríguez subliñou que se trata dunha iniciativa "moi positiva" para o alumnado, como para o profesorado e as propias institucións. Os estudantes adquiren formación histórica, pero tamén asumen, "xa desde idades temperás, os valores democráticos necesarios para "garantir un bo clima de convivencia".

"Ademais, asimilan como próximos aqueles lugares que garanten os servizos públicos, resolven os problemas dos cidadáns e tratan de mellorar o benestar da sociedade", remarcou, antes de esgrimir que se tenta "favorecer unha cidadanía democrática e responsable presente e futura".

PROGRAMA

O programa de actividades desenvolverase nos cursos escolares 2017/2018, 2018/2019 e 2019/2020. Nel participarán centros educativos galegos de titularidade pública con alumnado de 5º e 6º de Educación Primaria, e 1º e 2º de ESO formándose grupos dun mínimo de 30 e un máximo de 60 participantes.

En calquera caso, en cada visita o alumnado distribuirase en grupos por etapa educativa e nun número que se considere adecuado para sacar proveito da visita sen interferir na actividade das institucións.

Con carácter previo, o programa didáctico desenvolverase dentro das aulas mediante a entrega e traballo cos materiais proporcionados polas institucións.

Tanto a través dos contidos, pero das propias visitas, procurarase desenvolver competencias fundamentais, en concreto a social, a cívica e a competencia en sentido da iniciativa e espírito emprendedor, coa incorporación dos principios de Goberno Aberto e transparencia.

Despois de realizar o traballo previo de formación nas aulas, concertarase a visita ás institucións. En cada institución, o grupo será recibido por unha autoridade que lle dará a benvida para despois realizar a visita por cada sede institucional guiados por profesionais que lles explicarán o funcionamento.

COMPROMISO DE APERTURA

Tanto Santalices como o conselleiro lembraron que este martes se cumpren 36 anos da constitución do Parlamento de Galicia e que, con este acto, péchase a conmemoración do 35 aniversario da Cámara.

"O labor daqueles deputados pioneiros e os que os seguiron, o da Xunta e o do conxunto da sociedade galega, pagou a pena até o punto de que Galicia se situou entre os territorios con maior autonomía política de Europa e converteuse nunha autonomía crible, solvente e respectada, considerada por moitos un modelo a seguir", resumiu o xefe do Lexislativo.

Finalmente, chamou ao persoal docente a implicarse na posta en marcha dun programa que se activará despois das vacacións de Nadal. As solicitudes poderán tramitarse a través da páxina web do Parlamento de Galicia.