Feijóo avisa aos funcionarios de Xustiza que non lles poden subir un 16% o soldo
En todo caso, destaca que hai puntos de acordo e chamou aos sindicatos a volver á mesa de diálogo.
Por E.P. | SANTIAGO DE COMPOSTELA | 25/01/2018 | Actualizada ás 18:46
O presidente da Xunta, Alberto Núñez Feijóo, advertiu aos empregados públicos da Xustiza, que este xoves secundan unha xornada de folga, que a Administración autonómica non lles pode subir o salario un 12 ou un 16 por cento, pero quixo destacar que hai puntos de acordo e chamou aos sindicatos a volver á mesa de diálogo.
Preguntado na rolda de prensa posterior ao Consello da Xunta, o mandatario autonómico, que manifestou o seu "respecto" polo dereito a folga, avisou de que "ningunha discrepancia se vai a resolver sen falar" e afeou aos sindicatos que se "levantasen da mesa de negociación".
"A Xunta segue na mesa de negociación", defendeu o máximo dirixente galego, quen asegurou que "hai cinco puntos e acordo en tres deles", aínda que hai "unha diferenza non menor" con respecto ás condicións salariais.
"Piden un incremento de entre o 12 ou o 16 por cento, non podemos subir os salarios esa porcentaxe", advertiu, aludindo ao "impacto" que suporía, en referencia ás arcas públicas e, en concreto, aos orzamentos en vigor.
Os sindicatos criticaron que publicamente o vicepresidente da Xunta, Alfonso Rueda, de quen depende esta materia, dixese que había avances e, con todo, fose o director xeral de Xustiza o que sentase con eles nunha reunión que acabou deixando o diálogo roto.
"Hai posibilidades de chegar a puntos de confluencia e seguimos abertos ao diálogo", insistiu Feijóo na súa resposta. "Esperamos que se poida retomar", sentenciou, sobre a volta ao diálogo.
