Luis López acusa ao BNG de apoiar carreiras nas que participou o Israel Premier Tech
O presidente da Deputación de Pontevedra: "Hoxe é Gaza, onte era outro problema e mañá será calquera outro".
Por Europa Press / Redacción | PONTEVEDRA | 08/09/2025 | Actualizada ás 22:25
O presidente da Deputación de Pontevedra e do PP nesta provincia, Luis López, acusou ao BNG de "dobre moral" polas protestas que apoia ante o paso da Vuelta por Galicia e preguntouse se "o que importa en realidade é axitar sempre unha pancarta". "Desde a Vicepresidencia na Deputación de Lugo, o BNG apoiou en marzo a carreira ciclista de O Gran Camiño, na que participaba o equipo israelí que agora piden vetar. "Por que non pediron entón a súa retirada. A dobre moral de sempre: para eles si, para Galicia non", expresou nun vídeo difundido por redes sociais.
"Liberdade de expresión si, arriscar a vida dos ciclistas: non. Dereito a manifestación: si. Dereito a boicot: nunca. Creo que a gran maioría temos claro isto, menos os do radicalismo de sempre", arrinca o vídeo difundido por Instagram, Facebook e X o día previo a que este martes os ciclistas cheguen á súa provincia, tras os altercados rexistrados este domingo ao paso da Vuelta por terras de Lugo.
Por iso, Luis López realiza un chamamento a que este martes, na etapa Combarro-Mos, "os protagonistas sexan só a carreira e os ciclistas, Galicia e as Rías Baixas" e pide ás forzas políticas, sobre todo ao BNG, que chamen a "manifestarse a favor da seguridade da carreira". "Como non entender a preocupación ante o drama de Gaza?. Pero tamén me pregunto: como non decatarse de que o que hoxe é Gaza, onte era outro problema e mañá será calquera outro? Porque o que importa en realidade é axitar sempre unha pancarta?", expón.
