O Teatro Principal de Santiago acollerá os Premios Gala do Libro Galego 2018
A cerimonia celebrarase o sábado 19 de maio de 2018 no Teatro Principal de Santiago de Compostela, onde se darán a coñecer as obras gañadoras.
Por Galicia Confidencial | Santiago | 02/03/2018 | Actualizada ás 20:44
A Asociación de Escritores e Escritoras en Lingua Galega (AELG), Asociación Galega de Editoras (AGE) e Federación de Librarías de Galicia (FLG) convocan a terceira edición dos Premios Gala do Libro Galego. Con estes premios as tres entidades relacionadas co mundo do libro pretenden recoñecer a excelencia do traballo realizado no ámbito editorial ao longo do ano 2017 en Galicia.
Nesta nova edición os Premios da Gala do Libro Galego incorporan novidades en relación ás categorías a recoñecer. Así, a anterior modalidade de literatura infantil e xuvenil dá lugar a dúas modalidades, e incorpóranse os premios á obra de divulgación, á banda deseñada e ao libro mellor editado.
En canto ás modalidades Iniciativa cultural ou de fomento da lectura, Proxecto literario na rede e Xornalismo cultural, que anteriormente premiaban o traballo realizado no ano previo, agora pasan a recoñecer a traxectoria de varios anos. Valorouse por tanto, a constancia ao longo do tempo nestes ámbitos.
