Despregadas barreiras anticontaminación após afundirse un pesqueiro en Muxía con 1.500 litros de gasoil
Fontes da Xunta din que a vertedura de combustible do pesqueiro afundido está "confinada na dársena" de Muxía. "O importante é reflotar o buque", di o rexedor, Félix Porto.
Por E.P. | SANTIAGO DE COMPOSTELA | 06/03/2018 | Actualizada ás 10:12
Efectivos da Xunta de Galicia despregaron barreiras anticontaminación despois de afundirse un barco pesqueiro sen ninguén a bordo a dez metros do peirao de Muxía (A Coruña) cunha carga de combustible de 1.500 litros.
Segundo explicaron a Europa Press fontes da Consellería do Mar, en Muxía hai persoal de Portos de Galicia e do Servizo de Gardacostas que despregaron barreiras anticontaminación.
As mesmas fontes do Goberno autonómico puntualizaron que a vertedura de combustible do pesqueiro afundido está "confinada na dársena" de Muxía.
O servizo de emerxencias 112 Galicia recibiu a alerta do afundimento do pesqueiro sobre as 23,15 horas do luns a través do aviso dun particular. Após o aviso, o 112 informou do ocorrido a Salvamento Marítimo, ao Servizo de Gardacostas, á Guardia Civil, a Portos de Galicia e a Protección Civil.
Pola súa banda, o rexedor de Muxía, Félix Porto, destacou que "o importante é reflotar o buque" e comentou que o luns pola noite había "moito cheiro a gas" após afundirse o barco.
