Europa avala o plan para a sardiña proposto por España e Portugal
Permitirá a ambos os dous países achegarse a capturas anuais de 14.600 toneladas en 2018. A Comisión Europea tivo en conta a dependencia da sardiña para as frotas española e portuguesa
Por E.P. | Santiago de Compostela | 08/03/2018 | Actualizada ás 18:16
O comisario europeo de Medio Ambiente, Asuntos Marítimos e Pesca, Karmenu Vella, anunciou á ministra de Agricultura e Pesca, Alimentación e Medio Ambiente, Isabel García Tejerina, e á súa homóloga de Portugal, Ana Paula Vitorino, a conformidade da Comisión Europea coa proposta do plan de xestión para a sardiña ibérica, presentado conxuntamente polos gobernos de español e portugués. Isto permitirá manter aberta a pesqueira e garante a recuperación da especie.
O plan inclúe medidas como o establecemento de vedas temporais para a recuperación de xuvenís, moratorias, tallas mínimas, limitacións de desembarques e reforzo de controis, así como medidas de investigación científica para a avaliación e seguimento das medidas propostas.
A proposta permitirá a España e Portugal capturas anuais de 14.600 toneladas en 2018, das que 7.300 poderán ser capturadas até finais de xullo e os 7.300 restantes estarán supeditadas a que unha avaliación previa do Consello Internacional para a Explotación do Mar (ICES) confirme, cos datos das campañas desta primavera, que a biomasa tivo unha recuperación do 10% respecto dos niveis de 2017. Destas cantidades, un 33,5% corresponden á frota española. A través deste plan de xestión, cuxa vixencia vai desde 2018 a 2023, fíxase unha regra de explotación para este stock clara e precisa, cuxa aplicación permitirá un incremento mínimo do 10% da biomasa anual.
"INTENSO LABOR"
Un informe elaborado en 2017 polo ICES sobre o estado do stock da sardiña nas augas atlánticas da Península Ibérica concluía que os índices de biomasa e recrutamentos eran baixos, o que puña de manifesto unha preocupante situación biolóxica do stock, polo que suxería o peche da pesqueira para garantir a súa recuperación.
O departamento lembrou a dependencia socioeconómica que ten a sardiña para as frotas española e portuguesa, polo que ambos os países iniciaron un "intenso labor" para a elaboración de propostas que garantisen as actividades da pesca sustentable, con medidas de xestión coherentes que permitisen xerar beneficios económicos, sociais e de emprego.
