O PP, en mínimos históricos de intención de voto en Galicia
Os populares acadarían un 36,9% dos votos nun escenario de eleccións xerais, segundo unha enquisa de Sondaxe. Ciudadanos crecería catro puntos, aínda que sería o menor aumento entre todas as autonomías do Estado. En Marea desfaría ao seu favor o empate co PSdeG e consolídaríase como a alternativa ao populares. BNG aumentaría tamén o apoio, pero continuaría como quinta forza no país.
Por Galicia Confidencial | Santiago de Compostela | 11/03/2018 | Actualizada ás 14:28
O Partido Popular (PP) está en claro retroceo en Galicia. De celebrarse eleccións xerais agora, só acadaría o 36,9% dos votos, segundo unha enquisa do Instituto Sondaxe para La Voz de Galicia sobre intención electoral para uns comicios estatais. Sería o peor escenario histórico para os populares en Galicia, que perderían 4,6 puntos respecto das eleccións de 2016.
A caída do PP coincide cun aumento precisamente do 4% de Ciudadanos, que pasaría a obter o 12,6 % do voto valido total en Galicia, sendo a cuarta forza política no país, manténdose por enriba do Bloque Nacionalista Galego. Con todo, Galicia é a autonomía onde menos crecería a formación laranxa.
O BNG, malia aumentar apoio, pasando do 2,9% ao 4,1%, mantéñense como forza residual nun escenario de eleccións estatais e non acadarían, de novo, ningún escano no Parlamento español.
Outra forza que aumenta apoio electoral é En Marea, que se afianzaría comon a alternativa ao PP en Galicia ao subir do 22,2% ao 23%, asumindo xa o seu liderado entre a oposición aos populares no país, ao desfacer ao seu favor o empate que mantiña co PSdeG.
Os socialistas son, canda o PP, os únicos que perden apoio. A chegada á secretaria xeral do PSdeG de Gonzalo Caballero e a volta de Pedro Sánchez á fronte do PSOE non semellan ter efecto na pretendida revitalización do partido que, con todo, se mantería como terceira forza, cun 19,8% dos votos, caendo 2,4 puntos.
Así as cousas, os galegos castigarían os partidos tradicionais de ámbito estatal e aumentarían o seu apoio a forzas alternativas.
