Por Galicia Confidencial | Santiago de Compostela | 21/03/2018 | Actualizada ás 14:09
O malgasto en papel na Administración galega continúa, malia os plans da Xunta de reducir o seu consumo. Apenas un mes despois de anunciar o Goberno galego a Lei de Administración Dixital para reducir a cero o consumo de papel, o Servizo Galego de Saúde (Sergas) anuncia un gasto de nada menos que prreto dun millón de euros en folios.
O Diario Oficial de Galicia (DOG) vén de facer pública a resolución do 1 de marzo de 2018, da Dirección Xeral de Recursos Económicos, pola que se anuncia a licitación da contratación da subministración sucesiva de papel DIN A4 branco, para o seu uso en fotocopiadoras, impresoras, equipamentos de fax de papel non térmico e equipamentos multifuncionais.
O valor estimado deste contrato é de 950.328 euros, isto é, 57.116,16 euros máis que en 2016 e 2017, cando se licitou un contrato por 893.211,84 euros, cun aumento do gasto do 6,4%.
Este gasto millonario en papel é censurado pola Asociación de Médicos Interinos de Galicia (ASMIG), que insta o Sergas a "revisar de forma inmediata" esta compra de folios A4 por un importe total de 950.000 euros.
ASMIG pide ademais ao Sergas que "inclúa os cambios informáticos pertinentes para evitar o enorme malgasto de papel que cada día se produce na sanidade pública" e lembra que "con ese enorme investimento se poderían adquirir ata 400.000 paquetes de 500 folios, o que de xeito evidente é un enorme disparate".
O anuncio deste gasto de case un millón de euros en folios chega cando hai apenas un mes o Goberno galego avanzaba os detalles do anteproxecto da Lei de Administración Dixital que debería contribuír a reducir o consumo de papel na Administración Pública.
O propio presidente da Xunta, Alberto Núñez Feijóo, dicía: "Con este texto seguimos cumprindo o calendario lexislativo que nos demos a principios de lexislatura; imos darlle rango de lei á modernización interna e externa da Xunta", proclamou Feijóo, quen se reafirmou no obxectivo de que a Administración autonómica poida traballar con "cero" papeis a partir deo ano 2020.
A aprobación deste anteproxecto supón a adaptación da Administración galega ás obrigas establecidas na normativa estatal, pero tamén aspira a mellorar estas esixencias e "consolidalas en rango de lei".
Con todo, o Sergas vai contracorrente e aumenta o gasto en papel.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.