Por Galicia Confidencial | Touro | 27/03/2018 | Actualizada ás 10:45
O rexedor de Touro, o popular Ignacio Codesido, protagonizou a pasada semana unha acción que non pasou desapercibida para a cidadanía e grupos da oposición do concello. Así, e de xeito ostentoso, o alcalde rachou coas demandas da veciñanza que se opoñen á mina de Touro-O Pino. Un xesto que lle valeu numerosas críticas.
De feito, nun comunicado, a Marea de Touro denuncia a “prepotencia” de Codesido e a súa “falta de empatía e solidariedade”. “Dende que comezou a exposición pública do Proxecto Touro, o Sr Ignacio non dubidou en posicionarse ao lado da empresa extractiva, de dubidoso currículo mesmo na localidade, deixando totalmente desprotexidos a centos de veciñas que ven en perigo a súa forma de vida e a posibilidade de seguir a vivir no concello”, denuncia esta formación nun comunicado.
Así reacciona Ignacio Codesido, alcalde de Touro, cando veciñas e veciños lle trasladan por escrito as súas queixas sobre a Mina de Touro pic.twitter.com/6f0ncHxgGg
— Nós Televisión (@NosTelevision) March 23, 2018
“Xestos de prepotencia e falta de respecto como os do pasado venres o único que fan é dividir máis ao pobo e crear un clima de tensión e intolerancia que non estamos dispostos a asumir”, indica ao tempo que lle pide ao alcalde que se desculpe públicamente ou que dimita.
A Marea de Touro tamén di “ver con incredulidade” as declaracións que fai en diferentes medios o alcalde, afirmando que as balsas da mina en Bama se desbordaban moitas veces e non só neste momento ou que o proceso de restauración da mina anterior foi un fracaso e que ahora utilízana como vertedoiro descontrolado.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.