Feijóo xa non se molla por Cifuentes e evita dicir se debe ou non dimitir

O presidente da Xunta, Alberto Núñez Feijóo, recalcou este venres que a súa homóloga en Madrid e compañeira de filas no PP, Cristina Cifuentes, "empeñou a súa palabra" na Asemblea da súa comunidade ao defender a lexitimidade do seu máster na Universidad Rey Juan Carlos e subliñou que o parlamento autonómico é "o lugar máis solemne" no que un político pode "empeñar a súa palabra".

Despois de participar nun acto na Cámara galega e antes de desprazarse a Sevilla para participar na convención estatal do PP, Feijóo evitou pronunciarse acerca de se Cifuentes debería dimitir no caso de que quede probado que mentiu sobre o máster dado que "empeñou a súa palabra", pero si incidiu na "responsabilidade" que supón para un político "dicir unha cousa" nun parlamento autonómico.

"Cando un político di unha cousa nun parlamento, ten unha responsabilidade ante todos os cidadáns que están representados nese parlamento", sentenciou o líder do PP galego, quen na pasada xornada subliñou que Cifuentes dera a súa palabra, antes de engadir que el a cre xa que non ten "indicios" para dubidar dela.

Un día despois, ante a investigación da Fiscalía e despois de recoñecer o director do máster, Enrique Álvarez, que a acta foi unha "reconstrución en termos xurídicos", Feijóo afirmou que el dixo e mantén que "a presidenta empeñou a súa palabra no lugar máis solemne para empeñar a palabra dun político, o parlamento autonómico".

ACLARACIÓNS DA UNIVERSIDADE

"Hai unha palabra empeñada por parte dun presidente autonómico nunha Asemblea e hai novidades e informacións contraditorias no ámbito académico, algo que debe ser aclarado", reflexionou, dando a entender que é a universidade a que debe clarificar as "aparentes contradicións" que hai neste caso.

"Necesitamos saber o que ocorreu, se ocorreu algo no ámbito da universidade e se hai algunha responsabilidade e de quen. Deixemos que se nos concrete despois desta investigación onde pode haber, se a hai, algunha responsabilidade. E que a universidade aclare exactamente como fixo en relación con este máster e como acredita unhas notas e un título que certificou", instou.

CONVENCIÓN

Ante a incidencia que pode ter este caso na convención que o PP celebra en Sevilla até o domingo e na que el, do mesmo xeito que Cifuentes, vai participar, defendeu que esta convención leva "moito tempo convocada" e falarase "do que interesa aos cidadáns".

Ao seu xuízo, aínda que "pode interesar que se concrete a decisión universitaria para expedir un título", os cidadáns "merecen que o primeiro partido de España fale de temas relevantes para os españois e España".