O soberanismo galego na manifestación para legalizar Sortu
Independentistas galegos viaxan a Bilbao para a manifestación a prol do novo partido da esquerda abertxale, que rexeita o uso da violencia, incluída especificamente a de ETA.
Por Galicia Confidencial | Bilbao | 19/02/2011 | Actualizada ás 11:53
Causa Galiza, plataforma na que colaboran case todos os pequenos colectivos independentistas do país, estará na manifestación deste sábado en Bilbao a prol da legalización do novo partido político Sortu e "polo desenvolvemento da superación do conflito existente en Euskal Herria". Ao igual que para Galicia, a plataforma reclama o recoñecimento pleno do dereito de autodeterminación para Euskal Herria.
Na súa opinión, Sortu "cumpre hoxe todos os requisitos xurídicos exixidos pola antidemocrática Lei de Partidos". Causa Galiza pide ao executivo ZP que busque "solucións" para rematar coa "imposición e a suspensión de dereitos e liberdades".
Causa Galiza defínese como "entidade social ampla e de esquerda na que conflúen persoas, colectivos, organizacións e forzas políticas galegas comprometidas coa defensa do dereito de autodeterminación do noso país, presentada publicamente en Xullo de 2007E.
Entre as súas actividades para a Esocialización do dereito de autodeterminación" destacan as marchas unitarias do 25 de Xullo e a presentación do Acordo Democrático Nacional o pasado 18 de Decembro.
O Bloque tamén reclamou a legalización de Sortu. "O BNG aposta decididamente pola legalización da nova formación política e a súa participación nos próximos comicios locais", dixo a fronte nun comunicado alegando o público rexeitamento do terrorismo etarra. Con todo, a fronte non anunciou a súa presencia en Bilbao esta fin de semana.
