Prepara o PSdeG un oco para Gonzalo Caballero no Parlamento galego?

Está xa o PSdeG preparando a chegada de Gonzalo Caballero á Cámara galega?. O líder socialista deixou caer que pode ser un obxectivo, pero non para agora, senón para o vindeiro ano. Nunha entrevista concedida na Cadena Ser, asegurou que mantería polo menos este ano o seu traballo na Universidade de Vigo.

Preguntado sobre esta cuestión, o portavoz parlamentario do PSdeG, Xoaquín Fernández Leieceaga, defendeu que o líder dos socialistas galegos, Gonzalo Caballero, entre nun futuro como deputado na Cámara galega. "É normal que o secretario xeral do partido estea alí onde a política galega se exemplifica, que é o Parlamento", manifestou.

Ademaisdefendeu que quen lidera o partido en Galicia entre nun futuro na Cámara ao considerar que é por onde "pasa toda a axenda política de Galicia". Así mesmo, preguntado sobre se deberá ostentar a portavocía do Grupo, cargo que neste momento realiza o propio Leiceaga, púxose ao servizo do partido. "Eu estou sempre ao servizo do meu partido, e iso quere dicir sempre", manifestou.

"O posto non é meu", subliñou antes de sinalar que "o secretario xeral dun partido ten unha posición dominante no Parlamento cando está".