Veciños de Vilaboa organizan reténs para evitar a derriba da casa dunha familia
A casa está afectada pola Axencia de Protección da Legalidade Urbanística (Aplu), e á espera de que haxa "algún movemento por parte da Xunta".
Por E.P. | VIGO | 22/05/2018 | Actualizada ás 18:13
Segundo informou o propio afectado, Enrique López, os veciños, que están agrupados na plataforma Salvemos Vilaboa, manteñen a vixilancia nas proximidades da casa por se se aproxima maquinaria pesada.
Así as cousas, a demolición estaba prevista para este luns, e desde entón "poden vir calquera día" a derrubala, mesmo de madrugada. "Onte non viñeron, hoxe tampouco e tampouco recibimos comunicación, seguiremos esperando", puntualizou.
A orde de derriba da Aplu é consecuencia dunha sentenza do ano 2009, que este veciño considera que xa "está caduca, porque pasaron nove anos", e que afecta á súa vivenda por atoparse dentro dun perímetro de 100 metros de distancia respecto ao mar, concretamente a 80 metros.
Nesta orde de cousas, espera que polo menos se suspenda a derriba ata que se tramite o Plan Xeral de Ordenación do municipio, que legalizaría a súa situación e xa está aprobado de forma provisional aínda que "a Xunta está a retardalo" ao pedir "aclaracións continuas".
