Por Galicia Confidencial | Ames | 31/05/2018 | Actualizada ás 20:43
Nais e pais do concello de Ames concentráronse este xoves no consistorio para esixir unha solución para as familias con necesidades de conciliación e evitar que haxa estudantes que se queden sen comedor escolar.
O conxunto de Asociacións de Nais e Pais de Alumnos (ANPAS) de Ames, por decisión unánime da asemblea conxunta do 25 de maio, convocaron esta manifestación na Praza do Concello ás 19:30horas, co motivo da celebración do pleno ordinario, ás 20:30 horas. Baixo o lema principal, "Ningún neno sen comedor", tamén lanzaron mensaxes como "Queremos conciliar, non emigrar".
A comunidade de pais e nais pide que ningún neno con necesidades de conciliación, polos motivos que sexan, quede fóra do servizo. Malia o seu intento de falar cos representantes dos cidadáns, o certo é que o Goberno local rexeitou o encontro.
A realidade é que hai 80 familias que non teñen praza de comedor e non teñen posibilidade de conciliación, e vense na situación de ter que buscar outro colexio, fóra da súa contorna, onde poidan conciliar.
"Hoxe son esas 80 familias, pero mañá pode ser a túa, non o esquezas", avisan os afectados ao resto da cidadanía.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.