Feijóo non descarta, agora, marchar a Madrid

“O meu compromiso é con Galicia”. Foi a súa frase máis repetida nas últimas semanas pero este xoves, por primeira vez en moito tempo, Alberto Núñez Feijóo non quixo confirmar ese “compromiso” cos galegos que o une a Galicia ata 2020 como presidente da Xunta. “Son presidente da Xunta e se cambio de opinión, por suposto que o direi”, dixo ao tempo que admitía que o que está pasando no Partido Popular en Madrid ten un “impacto directo” no partido en Galicia.

Nunha rolda de prensa posterior ao Consello da Xunta case monotemática en relación as súas posibilidades como sucesor de Mariano Rajoy, Feijóo evitou en todo momento respostar se presentará a súa candidatura, tal e como lle piden numerosos líderes e baróns populares. “Eu son presidente da Xunta e esta rolda de prensa é como presidente da Xunta non como líder do PP”, limitouse a responder en varias ocasións.

Así que houbo que preguntarlle por se como presidente da Xunta manterá o seu “compromiso” de dirixir aos galegos ata o final da lexislatura. E foi aí cando comezaron respostas que, ata este xoves, non dixera. “Eu son presidente da Xunta e é un orgullo selo porque para iso me votaron os galegos”, suliñou. “Sigo sendo presidente e se cambio de opinión xa o diría”, engadiu.

“E cando o dirá?”, preguntouselle tamén. “Pois cando tome a decisión que será cando se convoque o Congreso Extraordinario do PP, nos tempos que marque a Xunta Directiva do próximo luns”, dixo.

"IMPACTO NO PP DE GALICIA"

O mandatario autonómico esquivou as numerosas preguntas sobre esta cuestión e non quixo dar máis pistas sobre o seu futuro, aínda que si admitiu que a situación do PP podería ter un "impacto" directamente no partido en Galicia no que respecta aos calendarios previstos, como o das eleccións municipais. En todo caso, asegurou que sería "un impacto" de semanas e non de meses.

O presidente galego mesmo chegou a chancear cos xornalistas pola súa insistencia. “Tranquilos que todos  recibirán a convocatoria cando teña que falar, tanto os que son habituais aquí como os que non os vexo tanto nesta rolda de prensa e que me agrada velos”, ironizou nunha rolda de prensa na que utilizou moito máis o español que o galego ante a presencia de "medios de Madrid".