En Marea pide ao Goberno que "rescate" a AP-9 coa mesma "rapidez" que o fixo con varias autoestradas españolas
Esta formación lembra que, no Congreso, xa puxo sobre a mesa que se destinen "todos os fondos" orzamentados para a construción da autovía A-57.
Por E.P. | SANTIAGO DE COMPOSTELA | 18/06/2018 | Actualizada ás 14:53
En Marea reclamou ao Goberno central que preside Pedro Sánchez que "rescate" a AP-9 coa mesma "rapidez" que o fixo con varias autoestradas españolas que, segundo anunciou este luns o ministro de Fomento, José Luís Ábalos, serán gratuítas unha vez terminen as súas concesións de explotación.
En concreto, a medida afecta directamente á AP-1 entre Burgos e Armiñón (Áraba), de 84 quilómetros, cuxa concesión vence o próximo 30 de novembro, e á AP-7, entre Alacante e Tarragona, e a AP-4, entre Sevilla e Cádiz, cuxas concesións conclúen o 31 de decembro de 2019 e contan con 468 quilómetros en total.
Así, Villares saudou a "nova política de peaxes" do Executivo español, ao que instou a facer o propio coa Autoestrada do Atlántico "non só coa mesma sensibilidade, senón coa mesma inmediatez".
Deste xeito, lembrou que o partido instrumental xa puxo sobre a mesa que se destinen "todos os fondos" orzamentados para a construción da autovía A-57 para, así, "rescatar" a concesión da AP-9, en mans de Audasa ata o ano 2048.
