O BNG lamenta os "primeiros erros" de Pedro Sánchez en materia laboral

A portavoz nacional do BNG, Ana Pontón, lamentou que o novo Goberno que lidera Pedro Sánchez cometese xa os seus "primeiros erros" ao non incluír na súa axenda a derrogación da reforma laboral aprobada polo PP, incrementar o salario mínimo ou acabar co sistema de copago de medicamentos.

Este luns durante unha rolda de prensa en sede parlamentaria, a líder frontista indicou que ven "con preocupación" que nas súas dúas primeiras semanas á fronte do Executivo estatal o Partido Socialista se mostre " timorato" á hora de cumprir a súa promesa electoral de derrogar a reforma laboral, aínda que recoñeceu que Sánchez "está a tempo de rectificar".

Por iso, chamou a participar na xornada de mobilización convocada pola CIG este martes 19 de xuño para, deste xeito, aumentar a "presión social" de modo que "faga que os cambios non sexan unha mera alternancia" de partidos á fronte do Goberno e avanzar na configuración dunha "axenda" para Galicia.

Pontón aproveitou para repasar a situación socio-laboral en Galicia desde a chegada de Alberto Núñez Feijóo á Xunta e que presenta, para o BNG, un balance marcado pola "precaridade", "o empobrecemento" da poboación e o aumento da desigualdade.

Así, apuntou que desde o ano 2009, Galicia conta con 25.000 parados máis, o que se suma ao aumento das persoas sen ocupación --120.000 máis en nove anos--, especialmente entre os máis novos, o que provoca, segundo Pontón, que "100.000" galegos de entre 16 e 34 anos tivesen que emigrar na última década.

Así mesmo, a líder frontista detívose na situación socio-económica das mulleres, marcada pola fenda salarial que fai que as mulleres cobren "5.479 euros" menos que os seus compañeiros homes, o que supón que, no últimos nove anos, este indicador aumentase en "1.000 euros", "catro veces máis rápido" que a media do Estado.

Ana Pontón culpou desta situación ao "desleixo" do Goberno que dirixe Alberto Núñez Feijóo ao non articular "ningunha política activa de emprego real" como demostra, ao seu entender, que "se deixasen" de executar 1.000 millóns de euros en fondos orientados ao devandito apartado.