Lores sobre Feijóo: "Tonto non é e por iso non marchou a Madrid"
Cre que Feijóo non marchou a Madrid "porque ía levar unha castaña coma a copa dun pino".
Por E.P. | VIGO | 28/06/2018 | Actualizada ás 13:03
O alcalde de Pontevedra, Miguel Anxo Fernández Lores (BNG), afirmou este xoves que o presidente da Xunta e do PPdeG, Alberto Núñez Feijóo, decidiu non competir pola presidencia nacional do seu partido e quedar en Galicia porque "ía levar unha castaña como a copa dun pino".
Así o sinalou durante a súa intervención no coloquio posterior a un almorzo organizado en Vigo por Forum Europa, no que os asistentes lle preguntaron a súa opinión sobre a decisión de Feijóo de non ser candidato a presidir o PP.
Segundo apuntou o rexedor pontevedrés, o presidente galego "dixo que quedaba para cumprir os seus compromisos con Galicia", algo que cuestionou posto que os 'populares' "ocupan o poder, pero plantexamento de futuro para Galicia non teñen ningún".
"Non se foi alá (a Madrid) porque ía levar unha castaña coma a copa dun pino. O PP nacional está como está, e dentro é unha gaiola de grilos. Logo escapóuselle que, se cadra, marcha en 2020, pero agora mesmo sería de tontos", sentenciou Fernández Lores, quen engadiu que Feijóo "tonto non é".
