Por E.P. | SANTIAGO DE COMPOSTELA | 16/07/2018 | Actualizada ás 14:43
O portavoz de En Marea, Luís Villares, instou este luns ao histórico dirixente nacionalista Xosé Manuel Beiras e ao resto de "líderes sociais" do espazo político rupturista a "aproveitar as súas intervencións para propoñer solucións aos problemas do país e para ilusionar á cidadanía con alternativas ao PP".
"Niso debemos centrar o noso discurso público", asegurou este luns Villares nunha rolda de prensa na que foi cuestionado sobre as declaracións de Beiras --un dos seus valedores hai dous anos para o seu salto á primeira liña política--. Nelas, o veterano dirixente lamentou o rumbo tomado pola dirección do partido instrumental, aos que pide que recoñezan que o proxecto "ten problemas" que deben ser solucionados.
"As declaracións pódense aproveitar mellor para outras cousas", respondeu o maxistrado lucense á pregunta de se lamenta a reflexión exposta por Beiras o pasado sábado ao termo da coordinadora de Anova que acordou a adhesión da formación nacionalista á proposta de Compostela Aberta para iniciar un proceso de reconfiguración do proxecto de En Marea.
En canto a isto, Villares remitiuse á postura da coordinadora do partido instrumental que el mesmo encabeza. A dirección de En Marea rexeita, como propón a formación que encabeza o alcalde santiagués, Martiño Noriega; a creación dunha "mesa da confluencia", pois entenden que sería "un paso atrás" que traizoaría o espírito do proxecto, xa que cren que se retomaría a idea dunha "coalición" de partidos superada, para a coordinadora, desde a configuración de En Marea como formación de adscrición individual.
"Os nosos representantes públicos e líderes sociais do espazo de En Marea deben aproveitar as súas intervencións para propoñer solucións aos problemas do país e para ilusionar á cidadanía con alternativas ao PP. Niso debemos centrar o noso discurso público", remarcou Luís Villares.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.