Villares (En Marea) censura que Feijóo esixa a Sánchez cumprir "compromisos" que "non alcanzou" con Rajoy
O partido instrumental critica o "cinismo" de Feijóo por acudir a Moncloa como "abanderado" dos afectados pola explosión de Tui
SANTIAGO DE COMPOSTELA | 17/07/2018 | Actualizada ás 22:30 por EUROPA PRESS
O portavoz de En Marea, Luís Villares, criticou a "impostura" do presidente da Xunta, Alberto Núñez Feijóo, quen este martes mantivo unha reunión co presidente do Goberno, Pedro Sánchez, para, segundo o partido instrumental, "esixirlle" o compromiso "dunha axenda galega que nunca existiu".
"Feijóo non pode esixir na Moncloa retomar ningún compromiso previo para Galicia, simplemente porque non o alcanzou durante a etapa de Mariano Rajoy", esgrimiu.
Segundo informou En Marea nun comunicado, Villares censurou o cinismo do presidente autonómico por acudir a Madrid como "abandeirado" dos damnificados pola explosión pirotécnica da parroquia de Paramos, en Tui (Pontevedra), "unha semana despois de rexeitar" as súas peticións no Lexislativo galego.
"Está ben que Feijóo fale de Paramos na Moncloa, pero puido facelo a semana pasada no Parlamento de Galicia e negouse, tal vez para non dicirlles á cara aos afectados que a vida dos falecidos de Tui vale menos que a dos mortos nos incendios de outubro", esgrimiu.
TRANSFERENCIA DA AP-9
En relación á transferencia da xestión da AP-9 á Administración autonómica, Villares lembrou que é unha reclamación que o PP vetou "até catro veces" no Congreso.
Ademais, o portavoz de En Marea lamentou que as reclamacións do dirixente galego se centren no AVE e deixe "de lado" os trens que "de verdade unen Galicia". Neste sentido, reclamou a "necesidade" de mellorar as liñas de proximidade que "a diario empregan os galegos nos seus desprazamentos".
Neste sentido, o partido instrumental lembrou os 2.400 millóns de euros que o Goberno de Mariano Rajoy deixou sen executar en materia de infraestruturas: "Que Feijóo pida agora a execución desas partidas implica recoñecer a inacción do seu partido".
En canto ao modelo de financiamento autonómico, Villares apuntou que Galicia "non necesita fondos" para atender ao envellecemento da Comunidade, "senón para revertelo".
Así mesmo, o portavoz de En Marea ironizou sobre o feito de que o presidente da Xunta leve á Moncloa "un asunto sobre o que non mostrou o máis mínimo interese até agora: "Pedro Sánchez ten sorte de escoitar a proposta de Feijóo neste sentido, que até o día de hoxe descoñecemos no Parlamento de Galicia".
