Por Galicia Confidencial | Santiago de Compostela | 30/07/2018 | Actualizada ás 14:11
A Federación de Sanidade de CCOO de Galicia anunciou este luns que vai recorrer xudicialmente a "discriminatoria" carreira profesional do SERGAS, que "deixa fóra" dos seus beneficios a milleiros de traballadores. Segundo os cálculos do sindicato, veranse afectadas unhas 12.000 persoas, isto é, un terzo do persoal sanitario público.
Con este recurso, que se presentará nos próximos días, o sindicato non pretende paralizar a carreira profesional, senón que os seus efectos se estendan a todo o persoal da sanidade pública. "Queremos unha carreira profesional para todas e todos", enfatizou Ángel Cameselle, secretario xeral de CCOO-Sanidade. Segundo o sindicalista, o persoal temporal, o funcionario e o laboral queda fóra desta carreira profesional.
No caso dos dous últimos colectivos, se pretenden facer carreira deberán solicitar a condición de persoal estatutario, "o que significa tanto a perda do seu réxime xurídico como das condicións laborais actuais", apunta. Por esta razón, Cameselle agarda que en Galicia aconteza o mesmo ca noutras comunidades autónomas, como Asturias ou Castela e León, onde a Xustiza obrigou a igualar os dereitos do persoal indefinido e interino.
CRÍTICAS ÁS PRESAS DOUTROS SINDICATOS
O secretario xeral de CCOO-Sanidade salientou que o Consello Nacional da federación decidiu "por unanimidade" rexeitar a proposta de carreira profesional da Xunta. "Chegamos a esta decisión despois dun longo debate interno. Non sabemos como outras organizacións puideron tomar a decisión só en hora e media e unicamente cunhas promesas formuladas de palabra que non cadran co que hoxe publica o Diario Oficial de Galicia", critica Cameselle.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.