En Marea acusa á Xunta de publicar en agosto o decreto da lei de inclusión social para "evitar alegacións"
A deputada Paula Vázquez Verao avanza que o partido instrumental presentará alegacións, xa que entenden que o "desenvolvemento orzamentario" proposto polo Goberno galego "non mellora" a actual renda de inclusión social.
Por Galicia Confidencial | Santiago de Compostela | 05/08/2018 | Actualizada ás 16:52
En Marea acusou á Xunta de "tentar coar" o decreto da Lei galega de inclusión social coa súa publicación durante o mes de agosto para evitar "que se presenten moitas alegacións", o que, para o partido instrumental, evidencia a "nula vontade" do Goberno galego á hora de contar coas achegas das entidades que traballan no ámbito da pobreza e a exclusión.
A deputada de En Marea Paula Vázquez Verao censurou que o Executivo autonómico publicase o decreto da nova lei o pasado venres 3 de agosto, sete meses despois de que o borrador do proxecto fose presentado o 21 de decembro de 2017 "con máis de tres anos de atraso".
"A pesar de que a Xunta tivo sete meses de 2018 para poder someter o proxecto do decreto a exposición pública, decide facelo en agosto, nun período no que non hai actividade parlamentaria e que coincide coas vacacións de verán", resaltou Verao.
Así, censura que o prazo de presentación de alegacións --que comeza este luns e péchase o día 27-- se vaia a estender ao longo de 15 días do mes de agosto. Para En Marea, trátase dun "prazo insuficiente" que "demostra a nula vontade da Xunta" de concertar o desenvolvemento da lei coas achegas das entidades sociais.
Así mesmo, a parlamentaria critica que a publicación do decreto se realice "sen responder a todas as suxestións recibidas por parte das entidades e da cidadanía ao borrador do decreto e sen conceder un período de debate coas entidades que llo solicitaron".
Por iso, avanza que o partido instrumental presentará alegacións ademais dun proxecto de lei que busca que se "modifique" a normativa proposta pola Xunta, xa que entenden que o "desenvolvemento orzamentario" proposto "non mellora" a actual Renda de inclusión social de Galicia (Risga).
"Os novos perfís da pobreza que se asentou coa crise esixen solucións novas que a actual Risga non é capaz de atender. En concreto, nos criterios para a valoración da situación de exclusión social ou de risco de exclusión seguen sen considerar como criterio específico, ademais da situación de desemprego, a situación de emprego precario, cando a pobreza laboral é unha realidade cada vez máis asentada", remarca Paula Vázquez Verao.
