Galicia fai historia: finalista no primeiro Europeo de fútbol gaélico
As seleccións galegas completan unha fase de grupos extraordinaria e gáñanse as finais do campionato que se celebra no marco da programación do Festival Intercéltico de Lorient.
Por Galicia Confidencial | Lorient | 11/08/2018 | Actualizada ás 18:30
Unha oportunidade histórica. Galicia pode converterse na primeira selección en gañar o Campionato Europeo de Fútbol Gaélico feminino e masculino.
As rapazas venceron á Bretaña no último dos partidos cun contundente 26-5 e certificaron o seu pase á final. Previamente, o poderío das nosas exhibiuse fronte Alemaña, á que Galicia gañou cun 33-2, e fronte a Francia, á que as heroínas galegas se impuxeron 18-7.
Os rapaces tamén completaron unha fase de grupos extraordinaria con vitorias sobre a selección de Gascuña (14-4), Francia (16-9) —nun partidazo dos galegos contra os grandes favoritos—, ademais da exhibición fronte Alemaña (44-5). O pase á final chegou tralo empate a 9 coa Bretaña, pasando á final tamén coma primeiros de grupo.
As finais xogaranse este domingo. O rival a bater, para ambas as seleccións galegas, será Francia.
