Por Galicia Confidencial | Touro | 28/08/2018 | Actualizada ás 19:25
Touro será parte da ruta cicloturista EuroVelo 3. A marca EuroVelo, de recoñecido prestixio internacional, conta actualmente con 14 rutas que discorren por diferentes países europeos. EuroVelo 3 parte de Noruega e ten como destino Compostela, pasando por Touro.
Este mes de agosto publicouse a licitación dos traballos de sinalización da ruta.
Isto fíxose despois de diversos estudos previos e comprobacións de que o trazado cumpre cos requerimentos mínimos da Federación Europea de Ciclistas, tales como anchura de vías ou estado do pavimento. Esta ruta segue o Camiño Francés cara Compostela.
IMPACTO ECONÓMICO NA COMARCA
Diferentes estudos acreditan o retorno económico que supoñen estas rutas nas localidades por onde pasan. O gasto medio é de 57 euros por persoa e día, cifra superior á media xeral do turismo. En Marea Touro considera que esta ruta é unha oportunidade de vitalización económica e social para a localidade ademais de sostible e duradeira. Por iso chaman á responsabilidade política e social, sobre todo en materia de medio ambiente e conservación do patrimonio.
O grupo municipal de En Marea considera imprescindible unha aposta clara pola conservación do medio ambiente e do patrimonio. Así declaran incompatibles as actividades agresivas ao medio coma o proxecto de megaminería actualmente en fase de tramitación.
INCOMPATIBILIDADE CO PROXECTO DE APERTURA DA MINA
O proxecto de apertura da mina de Touro conta con diversos informes sectoriais desfavorables. Aluden ao seu impacto negativo sobre o medio ambiente. Este proxecto agora contraponse á oportunidade socioeconómica que ofrece a EuroVelo3 para Touro. En Marea Touro pediu ao goberno local que abandone “a súa connivencia coas agresións ambientais nos terreos mineiros” e ao tempo “rexeite calquera proxecto de ampliación da mina”.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.