Estabilizado o incendio forestal de Chandrexa de Queixa e activo o de Quiroga
No de Ourense arderon 20 hectáreas e no de Lugo xa van máis de 100.
Por E.P. | SANTIAGO DE COMPOSTELA | 03/09/2018 | Actualizada ás 15:46
O incendio forestal iniciado de madrugada na localidade ourensá de Chandrexa de Queixa, na parroquia de Casteligo, está estabilizado, tras afectar a unha superficie próxima ás 20 hectáreas, e atópase activo, aínda que cunha evolución favorable, o de Quiroga (Lugo), que queimou máis de 100 hectáreas.
Así o informou a Consellería do Medio Rural sobre os dous incendios forestais que se rexistran este luns. No que respecta ao de Chandrexa de Queixa, iniciouse na parroquia de Casteligo, ás 01,10 horas e, segundo as últimas estimacións, afecta unha superficie de preto de 20 hectáreas.
No seu control estiveron traballando, desde o inicio do lume, 3 axentes, 15 brigadas, 4 motobombas, 7 helicópteros e 2 avións. Por outra banda, continua activo, aínda que con evolución favorable e "próximo a ser estabilizado", o lume forestal rexistrado no Concello lucense de Quiroga, na parroquia de Outeiro, iniciado ás 17,31 horas deste domingo e que puido ser provocado por un raio, segundo precisa Medio Rural.
Segundo as últimas medicións, afecta a unha superficie dunhas 100 hectáreas. Para extinguir o lume, mobilizáronse 1 técnico, 8 axentes, 37 brigadas, 14 motobombas, 2 pas, 11 helicópteros e 3 avións. A Consellería do Medio Rural lembra que está a disposición da cidadanía o número de teléfono gratuíto 085, ao que deben chamar en caso de detectar algún lume forestal. Ademais, toda a información actualizada sobre incendios forestais poderá ser consultada na conta aberta de twitter: @incendios085.
