Aumentan os mortos nas estradas galegas en verán
Galicia é a segunda comunidade con maior aumento do número de falecidos nas súas vías durante xullo e agosto, despois de Valencia, con 21 persoas mortas, 11 máis que no mesmo período de 2017.
Por E.P. | Santiago de Compostela | 04/09/2018 | Actualizada ás 18:59
Un total de 259 persoas faleceron nas estradas do Estado español en 236 accidentes mortais durante xullo e agosto de 2018, 34 mortos máis que no mesmo período de 2017, o que supón un incremento do 15%, segundo informou este martes o director xeral de Tráfico, Pere Navarro, que deu conta do balance oficial, aínda provisional, da DXT deste verán. Nas vías galegas morreron 21 persoas, 11 máis que nestes dous meses de verán do ano pasado.
De feito, Galicia sitúase como a segunda comunidade que rexistra un maior aumento do número de falecidos en xullo e agosto (con 11 máis), só por detrás de Valencia (+13). Detrás están Aragón e Castela e León (+7); Canarias (+6); Cataluña, Navarra e País Vasco (+3) e Murcia (+1).
Andalucía, Principado de Asturias, Baleares, Cantabria, Castela A Mancha, Estremadura, Comunidade de Madrid e A Rioxa presentan descensos en canto aos falecidos por accidente de tráfico no verán de 2018 respecto de 2017.
"Os datos non son bos este verán, pero non hai sorpresas despois de tres anos de aumentos continuos", valorou Pere Navarro, que apuntou que estes datos indican onde se debe "concentrar os esforzos", facendo fincapé na velocidade.
O ano pasado, a sinistralidade viaria do período estival descendeu con respecto á de 2016, cun 12% menos de falecidos e un 11,2% menos en accidentes mortais rexistrados. Deste xeito, as cifras volven á senda de ascenso, após os incrementos rexistrados no verán de 2015 e 2016.
DATOS PROVISIONAIS
Trátase de datos provisionais, contabilizados a 24 horas e referidos só a accidentes ocorridos en vías interurbanas. Ademais, estes datos non inclúen a totalidade da última Operación Retorno, que se desenvolveu entre o 31 de agosto ao 2 de setembro. Os días 1 e 2 de setembro producíronse 12 accidentes mortais, nos que perderon a vida 12 persoas.
Por meses, xullo rexistrou 127 falecidos, sendo o peor xullo desde 2012 (seis mortos máis que en 2017), así como o peor agosto tamén desde 2012, ao contabilizarse 132 vítimas mortais (28 máis que hai un ano). Agosto de 2017, con 104 mortos, foi o menos sinistro desde que se teñen rexistros.
En canto ao acumulado anual, un total de 799 persoas perderon a vida, 24 máis que desde o 1 de xaneiro ao 31 de agosto de 2017 (3% máis).
Segundo informou Navarro, das 259 persoas que faleceron este verán nas estradas, 198 perderon a vida nas estradas convencionais, o que supón o 76% do total de mortos.
Por tipo de accidente, a maioría foi saídas de vía (37%), seguido de colisións frontais (29%) e colisións laterais e frontolaterais (15%).
AUMENTA A MORTALIDADE DOS PEÓNS
Ademais, durante este verán, os usuarios vulnerables representaron o 34% dos falecidos (66 mortos dos 259). Deles, a maioría foron motociclistas (52), seguidos de peóns (23) e ciclistas (8). Con respecto ao ano pasado, os datos foron moi similares, fóra dos peóns, pois este 2018 houbo 8 mortes máis con respecto a 2017.
Segundo o balance presentado este martes, 29 dos falecidos en turismo non utilizaban cinto de seguridade no momento do accidente (23% do total de mortos no devandito tipo de vehículo). Respecto ao uso do casco, un usuario de ciclomotor e outros dous de moto, non levaban o casco. Entre os ciclistas, todos eles si facían uso do mesmo.
Con respecto á mobilidade, durante os meses de xullo e agosto producíronse 88,5 millóns de desprazamentos de longo percorrido por estrada, cunha media de 2,8 millóns de movementos diarios, o que supón un aumento do 1% respecto dos que se rexistraron o verán pasado (87,7 millóns). En xullo producíronse 42,3 millóns (1% menos que hai un ano) e en agosto 46,3 millóns (un 3% máis).
