Todas as marcas de Inditex venderán por Internet para todo o mundo en 2020

O presidente de Inditex, Pablo Isla, anunciou este martes que todas as marcas do grupo van estar dispoñibles para a súa compra a través de Internet en todo o mundo en 2020.

"Queremos facer dispoñible o noso produto de moda a todos os clientes en calquera parte do mundo onde se atopen, mesmo naqueles mercados nos que non hai tenda física", explicou Isla con motivo da inauguración da emblemática tenda Zara de Corso Vittorio Emanuele.

O presidente de Inditex destacou ademais que todas as cadeas terán stock integrado en 2020. Este feito supón que se poderán servir pedidos online a clientes desde calquera tenda de cada marca en todos aqueles países nos que teñen presenza física.

Actualmente, o stock integrado está implantado xa en Zara en 25 dos 48 mercados nos que ten plataforma de venda online, entre eles España, Francia, Italia, Reino Unido, China, Estados Unidos ou México, entre outros.

Toda esta "avanzada" plataforma de presenza global, segundo o grupo, é posible grazas ao desenvolvemento do proxecto RFID (Identificación de pezas por radiofrecuencia) que está nestes momentos presente xa en todo Zara e Uterqüe, está a desenvolverse no resto das cadeas e estará implantado definitivamente en todas elas para 2020.