Yolanda Díaz sobre a redución da xornada laboral ás 37,5 horas semanais: "Ímonos deixar a pel para conseguila"

A vicepresidenta segunda e ministra de Traballo e Economía Social, Yolanda Díaz afirmou que se "deixará a pel" para conseguir que a redución da xornada laboral a 37,5 horas semanais "vexa a luz" no Congreso dos Deputados. "Ímonos deixar a pel para que 12 millóns e medio de traballadores e traballadoras no noso país teñan reducida a xornada laboral", así o indicou Díaz durante a súa participación no diálogo con cidadáns 'Ao descuberto' sobre a redución da xornada laboral organizado por Sumar.

Yolanda Díaz asegurou que non vai cesar no seu empeño para seguir reducindo "as desigualdades da xente traballadora" tal e como fixo desde a primeira medida que tomou cando chegou ao Ministerio: a subida do salario mínimo interprofesional. Doutra banda, Yolanda Díaz manifestou que tentarán negociar con todos os partidos políticos xa que considera esta medida como "un proxecto de país". Sobre os apoios á rebaixa de xornada laboral, Díaz expresou que "o goberno cumpriu" e que "agora a voz téñena os partidos políticos no Congreso dos Deputados". A vicepresidenta defendeu as políticas que está a tomar o Goberno e que agora mesmo permiten que España sexa "o país que máis crece do OCDE" a un ritmo do 3,2 %".

OS CONTRATOS PARCIAIS PASARÁN A SER INDEFINIDOS

Ao mesmo tempo, a líder de Sumar expresou que esta medida terá un papel fundamental nos contratos a tempo parcial. Co novo proxecto, os traballadores a tempo parcial de 30 horas pasarán a ter "contratos ordinarios de carácter indefinido" de 37,5 horas á semana. "O eufemismo das horas complementarias e moitos elementos máis quedan fóra desta relación laboral", dixo Yolanda Díaz. Así mesmo, a titular de Traballo e Economía Social sostivo que esta medida vai servir para mellorar a vida dos traballadores, das empresas, así como a produtividade do país, pero sen renunciar a que os traballadores poidan "cobrar máis e traballar menos".

Xunto a iso, expresou que actualmente non suporía un gran cambio no tecido produtivo actual xa que hai comunidades e convenios laborais que teñen xornadas semellantes ás expostas. Ademais, exemplificou que "en España, desde os anos noventa ata hoxe, a produtividade incrementouse ao 53 % e os salarios só o fixeron ao 22 %". A ministra de Traballo e Economía Social volveu a soster o seu apoio a esta medida xa que pode mellorar a conciliación familiar. "Necesitamos homes e mulleres que poidan gañar tempo para dedicalo ás xentes que queremos". Ademais, Díaz considera que esta medida de redución de carga laboral moderará as baixas laborais por saúde mental.

A vicepresidenta segunda e ministra de Traballo e Economía Social, Yolanda Díaz, durante unha rolda de prensa posterior á reunión do Consello de Ministros | Fonte: Carlos Luján - Arquivo