Por E.P. | SANTIAGO DE COMPOSTELA | 25/09/2018 | Actualizada ás 13:55
En Marea aumenta a súa estimación de voto e sitúase no 1,1% para unhas eleccións xerais, segundo o último Barómetro do Centro de Investigacións Sociolóxicas (CIS) do mes de setembro. Unha enquisa que tamén apunta a un aumento do voto do PSOE e un estancamento do PP e que non recolle datos do BNG.
Deste xeito, a formación rupturista volve situarse por riba do 1%, após a caída producida en xuño, onde baixou até o 0,7%. Con todo, segue por baixo do 1,3% co que contaba en abril deste ano arrastrada pola baixada que tamén experimentou a marca de Unidos-Podemos, que segue nun 16,1% dos votos contando todas as confluencias, dous puntos por debaixo de Ciudadanos.
PSOE E PP
O PSOE repite na cabeza nas enquisas do CIS, cunha estimación de voto do 30,5%, seis décimas por riba da anterior enquisa e sacando unha vantaxe de 9,7 puntos ao PP, que se estrea con Pablo Casado á fronte e apenas catro décimas por encima do dato após a dimisión de Mariano Rajoy.
A terceira posición segue sendo para Cs, cun respaldo calculado do 19,6%, oito décimas por baixo do seu dato de xullo, e a cuarta praza é para Unidos Podemos, que suma un 16,1% con todas as súas confluencias.
Pola súa banda, o Barómetro, que se coñeceu este martes, revela unha intención directa de voto do 0,6% para En Marea, o que supón unha décima máis que o 0,5% co que contaba no anterior. Esta formación converteuse en partido instrumental, aínda que nas xerais de 2016 presentouse como coalición de Podemos-Esquerda Unida e Anova. Este 0,6% de intención directa de voto é o mesmo que existía en abril de 2018 para En Marea. Con todo, está por baixo do 1% que había en outubro de 2017.
O BNG segue sen aparecer como formación propia con aspiracións a volver ao Congreso. Os datos da enquisa do CIS situana "en otras formaciones" na que hai un conxunto de partidos políticos que, conxuntamente, obterían un 4,8% dos votos. Os que si aparecen son ERC co 4,1%, PdCAT co 1,9%, EH-Bildu co 1,1%, o PNV co 0,9% e Coalición Canaria, co 0,2%.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.