A CUT critica a segunda fase do programa da Xunta para a recuperación dos xulgados

A Xunta de Galicia porá en marcha o vindeiro luns 15 de outubro a segunda fase do plan de recuperación de traballo previsto para a administración de xustiza co obxectivo de " actualizar os atrasos acumulados con motivo da folga de funcionarios". Así o explicou esta mañá o decano de colexios de avogados de Lugo, Félix Mondelo, que indicou que está previsto que se instaure en 92 xulgados galegos onde haxa atrasos, nas ordes social, civil, de violencia de xénero e mercantil. A partir do 15 de novembro dito programa poríase en marcha nos xulgados do penal.

A medida foi avanzada pola Xunta o pasado mércores logo do encontro mantido entre o vicepresidente galego, Alfonso Rueda, e representantes do Consello da Avogacía; aínda que o comunicado emitido polo Executivo autonómico limitábase a avanzar que a segunda fase arrincaría este mes de outubro sen concretar unha data. Este xoves, Mondelo confirmou que será o luns o día en que bote andar este plan. Ademais, indicou que a Xunta trasladou a súa intención de pagar até 20 horas semanais por xulgado, o que correspondería a 2 ó 3 horas semanais por cada funcionario que acepte acollerse ao plan. O Goberno galego destinará 300.000 euros para este fin, que se suman aos 105.000 euros para a posta ao día do rexistro civil.

En todo caso, Félix Mondelo apunta que polo momento a Xunta non pode contar cos xuíces, letrados e fiscais da administración de xustiza para sinalar xuízos polas tardes, o que suporía realmente axilizar o traballo nos xulgados galegos. Por este motivo, manifestou que están "parcialmente satisfeitos" xa que se non se celebran os xuízos, quedarán pendentes as sentenzas polo que unicamente poderíase levar a cabo unha tramitación dos casos.

CRÍTICAS DA CUT

O sindicato Alternativas Na Xustiza-CUT saíu ao paso da noticia e criticou que a Xunta anuncie "de forma sorpresiva e ás portas dunha ponte festiva" a medida cando "está a piques de cumprirse seis meses desde o final da folga". "Ter que esperar case medio ano é unha verdadeira vergoña: as cifras de moitos destes xulgados, con cargas de traballo brutais, deberían ser motivo dabondo para que os plans de actuación empezasen inmediatamente tras terminar a folga e non seis meses despois", censura a CUT nun comunicado emitido este xoves.

Deste xeito, o sindicato asegura que a segunda fase do plan "obvia" a situación de órganos como os xulgados do Penal, de Instrución, do Contencioso ou de Vixilancia Penitenciaria, nos que, segundo a CUT, tras a folga "alcanzan números que non se recuperarán en moitos anos". Así as cousas, comparan os datos do segundo semestre de 2017 cos do presente ano en xulgados como o de Instrución número 1 de Lugo --de 20 a 106 demandas por incoar--; Vixilancia Penal de Lugo --de 31 expedientes sen incoar a 421 en 2018-- ou o xulgado do Penal de Ourense --de ningunha a 124 no segundo trimestre deste ano--.

A iso súmase a situación dos órganos das vilas como os xulgados mixtos con competencias en Violencia de xénero de Cambados, Marín, Ortigueira, O Porriño ou Redondela, que "serán os últimos en poder recuperar a carga de traballo por culpa da folga". En definitiva, Alternitavas na Xustiza-CUT asegura que os datos do CGPJ "deixan en evidencia" a "falta de estudo das cargas de traballo" por parte da Xunta á hora de elaborar o plan de recuperación dos xulgados, que cualifican de "míseros". Este xoves, o director xeral de Xustiza, Juan José Martín, mantivo unha reunión con representantes do Consello Galego de Procuradores para trasladarlles o contido da segunda fase do plan.