Por E.P. | VIGO | 17/10/2018 | Actualizada ás 14:28
Pontón fixo esta declaración tras manter unha reunión co reitor da Universidade de Vigo, Manuel J. Reigosa. "É certo que as universidades galegas están a facer moito cos recursos que teñen", afirmou, para engadir que eses recursos teñen que "incrementarse" para dar un "salto adiante". A portavoz nacionalista avanzou que presentará unha emenda aos Orzamentos da Xunta do próximo ano porque, aseverou, hai que "abandonar o contexto de crise" no que se elaborou a actual formulación ecónomica das universidades galegas.
"Sería importante que á universidade deixase de apertar o cinto", sostivo, para engadir que, deste xeito, poida cumprir cos obxectivos de "mellorar a precariedade do profesorado" e que se estableza unha mellora na "innovación" e na "investigación" dentro do ámbito universitario. Tamén lle trasladou ao reitor de Vigo a súa intención de "garantir" un acceso igualitario á universidade e apuntou que "o sistema actual de bolsas pode mellorarse moito".
Pontón reclama a transferencia da xestión de bolsas a Galicia e "triplicar os fondos" que lle adica a Xunta a este aspecto "primando" os aspectos económicos. "Que as bolsas sirvan para que a filla dunha traballadora teña as mesmas oportunidades que o fillo dun empresario", aseverou. Pola súa banda, Reigosa agradeceu o "interese" dos grupos políticos pola Universidade de Vigo, á que definiu como "un dos motores do futuro do país" e manifestou a necesidade de "captar talento" despois dos recortes.
Foi "unha reunión frutífera", en palabras do reitor, pois explicou que "concordan" en moitos dos puntos de vista "sobre o papel que a Universidade ten que xogar na promoción da innovación a nivel tanto da cidade, como global do sistema universitario de Galicia".
PULSO INDUSTRIAL
"Temos que recuperar o pulso industrial de Vigo desde a Universidade", asegurou Pontón, quen destacou que a universidade é un "elemento básico" para a cohesión social e "para que teñamos unha sociedade máis formada cunha capacidade crítica para mirar a realidade".
Pontón falou da necesidade dunha "aposta estratéxica" pola "innovación tecnolóxica" desde Vigo e da importancia de establecer "sinerxías" entre o sector industrial e o universitario. Neste sentido, o reitor da UVigo explicou que "no futuro" optarán por "adaptar" a oferta e a demanda das carreiras tecnolóxicas, xa que completan antes a súa cota de matriculacións.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.