O TSXG anula a orde da Xunta sobre os servizos mínimos na folga de telefonistas do 061
O Tribunal Superior de Xustiza de Galicia estima o recurso interposto pola CIG, porque o decreto da Xunta carece “dunha motivación adecuada”.
Por Galicia Confidencial | Santiago de Compostela | 28/11/2018 | Actualizada ás 19:27
A sección primeira da sala do Contencioso-administrativo do Tribunal Superior de Xustiza de Galicia (TSXG) estimou o recurso interposto pola Confederación Intersindical Galega (CIG) contra a orde do 31 de xullo de 2018 da Consellería de Sanidade na que determinou os servizos mínimos durante a folga deste verán levada a cabo polo persoal de operacións telefónicas da Central de Coordinación de Urxencias Sanitarias de Galicia 061.
O tribunal anulou a orde impugnada en canto á determinación dos servizos mínimos establecidos durante a folga ao persoal do Grupo Norte, empresa que xestiona a Central de Coordinación da Fundación Pública de Urxencias Sanitarias 061.
O TSXG argumenta no fallo que o decreto da Xunta carece “dunha motivación adecuada” que xustifique o cento por cento dos efectivos que fixaba como servizos mínimos.
A sala indica que a Consellería de Sanidade non especificou o número de telefonistas afectados polos servizos mínimos nin o número de traballadores que integran os cadros de persoal.
