Por Galicia Confidencial | Compostela | 11/12/2018 | Actualizada ás 22:00
José Ramón Lete Lasa podería relevar este xoves no cargo á ourensá Marta Míguez na Secretaría Xeral para o Deporte. O anuncio, filtrado este martes a La Voz de Galicia --xornal que soe anticipar nomeamentos e ceses do Goberno de Feijóo e do PP-- , supón unha carga de profundidade para algúns sectores do mundo do deporte que asumiu con sorpresa, e certa indignación, o feito de que o presidente galego teña decidido sacrificar a unha muller deportista, Marta Míguez, para meter “con calzador” a quen abandonara a Xunta para ir ao Goberno de Rajoy.
Míguez foi nomeada secretaria xeral en decembro de 2016 para substituír, precisamente, a Lete Lasa. E dous anos despois sairía pola porta de atrás de confirmarse a volta de quen se anunciara coma “fichaxe estrela” de Rajoy para a Presidencia del Consejo Superior de Deportes. Un cargo no que estivo escasamente ano e medio.
Con todo, polo momento, na Secretaría Xeral do Deporte non confirman o relevo de Míguez. Nos últimos meses Lete Lasa maniobrara nas altas esferas do PP, incluído o propio Feijóo, para tentar volver ao seu antigo posto, aínda que iso supuxera o cese dunha muller deportista que hai uns días, e con motivo dos seus dous anos no posto, aseguraba que se mostraba "orgullosa" de amparar aos "deportistas de alto nivel" e de “impulsar a igualdade".
Míguez colleu os mandos da Secretaría Xeral para o Deporte cando máis fortes eran as críticas contra a xestión de Lete Lasa. De feito, en abril de 2017, trinta asociacións facían público un escrito no que denunciaban o forte descenso de axudas nos últimos sete anos, de case un 50%. Anos que coincidiron co vasco ao fronte deste departamento.
IGUALDADE E DEPORTE DE ÉLITE
Tras a súa chegada ao cargo, Míguez tentou apaciguar os ánimos e impulsar programas de alto rendemento e de fomento da igualdade no deporte. Uns programas que comezaban, agora, a dar os seus froitos.
Coa súa experiencia como deportista de alto nivel “saíndo do rural”, potenciou o deporte de élite."O deportista de alto nivel non xorde por xeración espontánea, témoslle que consentir e darlle ferramentas de axuda", dicía recentemnente. Así, puxo en marcha o programa 'Eu son DGAN' (deportista galego de alto nivel), co que conseguiu que 42 persoas atopasen traballo despois de deixar atrás as súas carreiras deportivas.
E apostou pola igualdade, tanto de homes coma de mulleres, reclamando que o permiso de paternidade se amplíe á partir dos seis meses de baixa, e se prolongue por un ano a condición de deportista de alto nivel. Tamén activou a Escola Galega do Deporte e impulsou a Comisión contra a Violencia no Deporte e a Comisión de Prevención e Represión da Dopaxe, que "estaban na lei pero non desenvolvidas".
A súa intención este ano era tamén prestarlle especial atención aos deportes minoritarios e non tanto ao fútbol, ou ao baloncesto. Un proxecto que quedará en intención xa que o seu sucesor, Lete Lasa, destaca, especialmente, por potenciar os deportes maioritarios, nos que se sinte máis cómodo.
Marta Míguez foi xerente do Consello Municipal de Deportes entre 2002 e 2007. Antes foi campioa de España absoluta en lanzamento con xavelina nos anos 1998, 1999, 2000, 2001 e 2002. Entre os seus logros deportivos tamén destacan xunto á presenza nos Xogos de Sídney 2000, a medalla de prata nos Iberoamericanos de Guatemala (2002) e nos Xogos do Mediterráneo de Tunes (2001). O seu currículo formativo ampliouse tras a súa licenciatura en Educación Física cun Máster en Dirección e Xestión de Entidades Deportivas e cunha sólida experiencia profesional en Ourense.
LETE LASA E A SÚA VINCULACIÓN COA GÜRTEL
Lete Lasa foi entre 1978 e 1990 xogador de baloncesto en clubs como Estudantes, CAI Zaragoza, Breogán de Lugo, Obradoiro e Bosco de Vigo. Posteriormente ocupou diversos cargos na Xunta e na Comunidade de Madrid.
Comezou a súa xestión na Secretaría Xeral para o Deporte en época de Fraga, no 2003. Logo da victoria do Bipartito marchou coma subdirector xeral de Promoción Deportiva da Consejería de Cultura y Deportes de Madrid, que presidía entón Alberto López Viejo, imputado na trama de corrupción Gürtel por suborno, fraude, malversación, falsidade documental, asociación ilícita, branqueo de capitais, tráfico de influencias, contra a Facenda e prevaricación.
Lete apareceu nos xornais por asinar polo menos dous contratos con Diseño Asimétrico, unha das empresas da trama Gürtel na comunidade de Madrid, e era considerado a man dereita do político popular imputado. A pesar diso, nunca foi imputado no proceso xudicial aberto.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.