A dirección de En Marea denunciará ante a Fiscalía os accesos "irregulares" ao censo

O responsable legal de En Marea ante a Axencia Española de Protección de Datos, Gonzalo Rodríguez, avanzou que a dirección do partido instrumental porá en coñecemento de Fiscalía os accesos ao censo por parte de membros do comité electoral que, segundo a coordinadora, non estaban autorizados a facelo.

Gonzalo Rodríguez fala do proceso interno En Marea | Fonte: Europa Press

Así o indicou Rodríguez en declaracións á Radio Galega na mañá deste mércores. Acusou, ademais,  ao comité electoral de "verter tinta por todos os lados para que non se coñeza a realidade".

As declaracións de Rodríguez prodúcense un día despois de que o comité electoral rompese o seu silencio nunha comparecencia de prensa na que aseguraron que as persoas que accederon ao censo estaban autorizadas a facelo en cumprimento do regulamento das primarias, á vez que acusaron á coordinadora de "secuestrar" o proceso electoral.

Rodríguez, que ofrecerá este mércores unha rolda de prensa en Santiago, confirmou que a coordinadora, que solicita a revogación das tres persoas do comité designadas para o control do censo, trasladará a Fiscalía o sucedido para que o Ministerio Público investigue se estes "accesos irregulares" ao rexistro de inscritos son constitutivos de delito.

Por outra, o alcalde de Santiago, Martiño Noriega, considerou un mala noticia que se "xudicialice" o conflito de En Marea.