As tendas galegas pequenas

Fernando Aramburu leva xa trinta edicións da súa novela “Patria”, e nuns centros comerciais xigantes regalan con esta obra o libriño de “Klaus”, un relato novo do autor vasco. O mesmo sucede con Manuel Vilas e o seu emocionante éxito chamado “Ordesa” – con el, a empresa regala un libriño titulado “Hostal Don Juan”. Todo isto é lícito, e probablemente eu faría o mesmo que eses dous escritores se mo propuxeran.

Por Ramón Torrado | Ribeira | 14/12/2018

Comparte esta noticia
Porén, hai un elemento algo estraño aquí, algo que non cadra ben. Trátase da desvantaxe que sofren, neste caso, as librerías do país. O lector, polo mesmo prezo, leva menos. Como as ganancias dos grandes almacéns se adiviñan millonarias, o contraste – José Saramago sabía ben deste conflito - é escandaloso respecto ás librerías humildes, moitas das cales se ven obrigadas a pechar para sempre. En Santiago de Compostela, por dar un exemplo, estaban eses valiosos bazares do saber que eran Abraxas, González, Aerno, Encontros ou a propia Galí, na rúa do Vilar, que aseguraba ser a máis antiga de España en funcionamento. Todas estas librerías desapareceron na capital galega, unha cidade universitaria.
 
Da mesma maneira, como me comentaba hai uns días o amable e sabio bibliotecario de Porto do Son, José Manuel Mariño Ventoso, moitas persoas deixan de lado o comercio local - as tendas de toda a vida ou as novas que loitan por sobrevivir - en favor de grandes superficies ou mercando por internet. O groso dos beneficios sairá para países como Alemaña, Francia ou Suecia. Co adeus definitivo de moitos comercios pequenos, mingua a economía e o ambiente de moitas vilas e poboacións, que esmorecen e notan como a xuventude se marcha. 
 
Sen querer prexudicar aos empregados das grandes compañías, non sería aconsellable apoiar tamén aos pequenos e medianos comerciantes da nosa terra? Sabemos que non todos o merecerán, por non seren amables ou por non realizar un maior esforzo, pero son a nosa xente, e os seus ingresos transformaranse en parte mediante os impostos en melloras das escolas, dos centros médicos e da seguridade nas estradas, por mencionar algúns destinos importantes.
 
Hai un encanto, un agarimo, unha orixinalidade, unha humanidade e un calor humano nos establecementos pequenos que soamente en escasas ocasións se perciben nos grandes, xa que ó fin e ó cabo son as persoas as que marcan/mercan a diferencia.
 
* Artigo dedicado á librería Cándido de Rianxo, a máis antiga de Galicia
 

Pequeno comercio
Pequeno comercio | Fonte: EP
Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Ramón torrado Ramón Torrado Romero (Araño-Rianxo, 1966). Educado en Galicia, no País Vasco e nos Estados Unidos. Licenciado en Filoloxía Inglesa na USC, é profesor de instituto. Investigador rosaliano. Colaborador en Certo, xornal dixital de Barbanza. Ten escritas catro novelas, un libro de relatos e outro de viaxes. A súa última novela é Rebeca no val das sombras ardentes (Toxosoutos, 2018)".