Por Europa Press / Redacción | SANTIAGO DE COMPOSTELA | 07/01/2019 | Actualizada ás 19:59
A situación de En Marea continúa a expensas dos pasos e decisións que deberán tomar as organizacións que conforman o sector crítico con Luís Villares, vencedor nas primarias celebradas a finais de decembro e cuxo resultado segue sen ser recoñecido pola lista perdedora, 'Entre Todas'.
O consello de coordinación de Podemos Galicia --equivalente á executiva dun partido clásico-- reúnese na tarde noite deste luns para estudar os resultados da auditoría encargada a un perito informático da consultoría 'Securízame'. Con ela na man, a cúpula do partido morado avaliará os pasos a seguir co seu papel no proxecto de En Marea cuestionado por boa parte das súas bases e os seus cargos directivos.
Segundo fontes consultadas por Europa Press, Podemos ten previsto presentar publicamente os resultados da auditoría este martes, momento no que tamén será remitida aos seus inscritos. E farao pola súa conta, xa que os seus socios na candidatura crítica --EU e Anova-- marcan distancia cos movementos do partido morado.
No seo da formación que dirixe o deputado Antón Gómez-Reino existen voces que apostan por escenificar o distanciamento con En Marea, aínda que recoñecen que facelo a cinco meses das eleccións lcoales podería supor un 'hándicap' para os proxectos municipalistas nos que participan, como Santiago, Ferrol e A Coruña; mareas que participaron na candidatura do sector crítico.
Así, fontes do partido morado subliñan que a auditoría evidencia que a plataforma de voto --cambiada tras a paralización do proceso-- presentaba deficiencias de "seguridade" e que a coordinadora de En Marea podería infrinxir a lei de Protección de Datos, xa que o sistema non garante a privacidade do voto dos seus inscritos.
Ademais, Podemos estuda levar o proceso á vía xudicial, aínda que algúns dos seus membros cren que isto alargaría unha situación e xogaría en contra das posibilidades electorais nun ano con varias citas coas urnas, ás que se poderían sumar un hipotético adianto dos xenerais.
Así, máis dunha semana logo da constitución do Consello dás Mareas no que os 14 asentos que pertencen a 'Entre Todas' permanecen vacantes, as tres organizacións políticas que configuraron a coalición --xerme do partido instrumental-- para os xenerais de 2015 estudan por separado que estratexia seguir respecto dun proxecto común, En Marea, que atravesa unha profunda crise a cinco meses dunhas eleccións municipais que se antollan clave no futuro do proxecto da chamada unidade popular.
ESQUERDA UNIDA
Esquerda Unida foi a primeira en desmarcarse de En Marea. Fíxoo xa antes da celebración das primarias, paralizadas a principios de decembro por un suposto acceso irregular ao censo por parte de membros do comité electoral que foron vinculados coa organización que lidera a vicepresidenta segunda do Parlamento, Eva Solla.
Así, tras a continuación das votacións no fin de semana do 22 e 23 de decembro, EU facía pública a súa intención de non participar nas primarias ao consideralas un proceso "adulterado" por parte da dirección do partido instrumental. Días despois e coa vitoria da lista de Luís Villares, a organización federalista tachaba de "ilexítimo" o Consello dás Mareas por ser electo nun proceso "irregular".
Nunha entrevista concedida ao diario 'ABC' o pasado domingo, a coordinadora nacional de Esquerda Unida, Eva Solla, reiteraba que a súa organización non ten "interese en participar onde non existe espazo para o diálogo político", aínda que descartaba a ruptura do Grupo Parlamentario no que participa e polo que ocupa o cargo de vicepresidenta segunda da Cámara.
ANOVA
Pola súa banda, Anova estudará a situación nunha reunión da súa coordinadora nacional para a que aínda non hai data. Fontes do partido sinalan que a auditoría encargada sobre a plataforma de voto pertence unicamente a Podemos Galicia e non á candidatura 'Entre Todas', como transcendió nun primeiro momento.
O papel en En Marea da organización nacionalista xurdida tras a escisión do BNG tamén está no aire, xa que se dá o caso de que existe un sector dos seus militantes que apoia a Luís Villares mentres a dirección do partido chegou a cualificar de "golpista" a actitude do maxistrado lucense.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.