Alternativa Veciñal-En Marea do Carballiño denuncia posibles irregularidades en contratos municipais
A formación veciñal critica que tardaron tres anos en elaborar unha relación de postos de traballo "pagada a unha empresa allea ao Concello".
Por E.P. | SANTIAGO DE COMPOSTELA | 10/01/2019 | Actualizada ás 14:40
Alternativa Veciñal-En Marea do Carballiño (Ourense) anunciou a presentación dunha denuncia no Xulgado número 1 do mesmo municipio para que o tribunal valore "se houbo prevaricación administrativa na formalización e concatenación de contratos" temporais neste Concello desde o ano 2011. Así o expuxeron este xoves en rolda de prensa o concelleiro da formación Bernardo García e o coportavoz de En Marea na comarca, Manuel Pérez Nogueira.
Ambos sinalaron que teñen "indicios de que nos mandatos de Argimiro Marnotes --alcalde de 2011 a 2015 polo PP- - e Francisco Fumega --rexedor desde o 2015 polo PSDEG-- houbo descoido á hora de permitir a concatenación de contratos e suxerir a presentación de denuncias contra o Concello por parte dos interesados para ser incluídos por este sistema na organigrama laboral da entidade municipal".
Así mesmo, criticaron que se tardaron tres anos" en elaborar unha relación de postos de traballo, "pagada a unha empresa allea ao Concello e que non resolveu os problemas de persoal e organización como se pretendía".
"INTERESES CREADOS"
Esta, dixo, foi "un curta e pega da anterior" coa finalidade de "non mover ningún dos intereses creados a nivel laboral e incluso con diversas alegacións por parte do persoal por discriminación salarial a igual traballo". "Alternativa Veciñal presentou un contencioso administrativo contra esa RPT. Nesa RPT, entraron unhas 25 persoas por resolución xudicial dado que habían concatenado varios contratos laborais por obra. Se a iso engadimos os máis de 60 que entraron por ese método en tempos do alcalde Manuel Vázquez e outros, completamos a organigrama irregular á hora de acceder ao traballo no Concello do Carballiño nun persoal actual de aproximadamente 126 persoas", engadiu a formación.
Para rematar, subliñaron que este é o "único camiño" que o grupo de goberno deixoulles tras "moitos intentos" de "darlle unha solución política acorde coa lexislación vixente ao tema laboral" e "non recibir máis que descualificacións" e falta de información, "principalmente, do seu responsable de persoal", Adolfo Nogueira.
