"A contaminación por augas residuais na ría de Vigo é tan grave, que a UE podería volver condenar a España"

A organización ecoloxista Greenpeace denuncia verteduras de augas residuais ao mar en todas as provincias costeiras de España, incluídas as galegas.

En Galicia, destaca o caso de Pontevedra, porque "as consecuencias das verteduras, ademais de comportar malos cheiros e o peche de praias ao baño, afectan o marisqueo, base económica da zona", expoñen os ecolixistas.

Greenpeace sinala as rías de Arousa, Pontevedra e Vigo como as máis afectadas, xa que, segundo esta organización, teñen unha decena de núcleos afectados por verteduras durante o pasado ano 2018.

Os ecoloxistas subliñan o que acontece na cidade de Vigo, a cal, "aínda que foi inicialmente incluída" nunha sentenza da Unión Europea sobre este asunto en 2011, "deixouse fóra da multa do verán pasado". "Con todo", prosegue, "a contaminación por verteduras de augas residuais urbanas da ría da cidade é tan grave, que o Parlamento Europeo está a estudar a situación e podería volver condenar a España".

Greenpeace esixe que as administracións responsables tomen "decisións ambiciosas e efectivas". “É necesario un rigoroso cumprimento da normativa europea e uns sistemas de xestión de verteduras centradas en acabar coa contaminación do medio mariño. Para iso, é imprescindible un maior investimento en infraestrutura que asegure unha depuración efectiva e unha ordenación do litoral que controle a masificación urbanística e poña límite a novas fontes de verteduras ao mar”, conclúe  Paloma Nuche, responsable da campaña de Costas de Greenpeace.

Esta semana cúmprense seis meses desde que a Unión Europea multou a España a pagar 12 millóns de euros polo incumprimento da directiva comunitaria sobre depuración de augas residuais. "E poucas cousas cambiaron", láiase Greenpeace. Medio ano despois, sábese xa que España seguirá pagando a multa ata 2022.

Só en 2018, Greenpeace contabilizou polo menos 90 impactos por verteduras de augas residuais urbanas en ao redor de 80 municipios distribuídos polas 23 provincias costeiras (aproximadamente o 20% dos municipios costeiros). 

“Tanto por motivos de saúde pública como de protección do medio ambiente, a calidade da auga debería ser o obxectivo fundamental da súa xestión. Con todo, España está aínda lonxe de conseguilo. De feito, en moitos casos revelouse a pasividade das administracións responsables durante anos, como ocorreu coas verteduras do Val do Güímar, en Tenerife, ou os de Mallorca”, explicou Nuche.