A neve deixa sen clase a 2.889 alumnos de 46 centros educativos de Galicia

A neve rexistrada debido á borrasca 'Helena' deixou este venres sen clase a 2.889 alumnos de 46 centros educativos, dos que 34 suspenderon a xornada lectiva. Son datos da Consellería de Educación, nos que se constata que na provincia de Lugo foron 1.582 estudantes os afectados e na de Ourense, 1.307 alumnos.

A Xunta comunicou o xoves a decisión de suspender a actividade lectiva este venres nas zonas da montaña de Lugo e Ourense afectadas por un fenómeno meteorolóxico adverso de nivel laranxa por espesores de neve superiores a 20 centímetros.

Segundo os datos facilitados este venres por Educación, na provincia de Lugo suspendéronse as clases en 17 centros, todos os da zona de montaña e tres do centro, con 1.582 estudantes sen poder acudir á aula.

Os municipios con alumnos afectados foron os de Mondoñedo e A Pontenova na zona da Mariña; Antas de Ulla, Begonte, Castroverde, Guitiriz, Monterroso e Sarria, no centro; e na montaña os de Baleira, Baralla, Becerreá, Cervantes, Folgoso do Courel, A Fonsagrada, O Incio, Navia de Suarna, As Nogais, Pedrafita do Cebreiro, Samos e Triacastela.

Mentres, no sur da provincia de Lugo o único concello con estudantes afectados (107) pola neve foi o de Taboada, pero non se suspenderon as clases neste.

Pola súa banda, na provincia de Ourense 1.307 estudantes de 19 centros quedaron sen clase este venres, dos cales 17 suspenderon a xornada lectiva, todos eles da zona de montaña, concretou Educación.

Na zona da montaña ourensá tiveron centros afectados nos municipios do Bolo, Carballeda de Valdeorras, Castro Caldelas, A Gudiña, Maceda, Manzaneda, A Mezquita, A Pobra de Trives, Riós, A Veiga, Viana do Bolo e Vilariño de Conso.

Polo seu lado, na zona sur da provincia houbo centros afectados en Verín, con 15 alumnos do IES Castro de Baronceli, e Vilardevós, con 10 estudantes do CEIP Plurilingüe Rodolfo Núñez Rodríguez.