PP, En Marea e BNG, unidos para esixir medidas "concretas" e "firmes" ao Goberno central para Alcoa

Os grupos do PP, En Marea e BNG no Parlamento galego coincidiron este luns en reclamar á ministra de Industria, Comercio e Turismo, Reyes Maroto, medidas "concretas" e "firmes" para evitar o peche da planta de Alcoa na Coruña e salvar os máis de 400 traballadores afectados polo expediente regulador de emprego (ERE).

O portavoz do Grupo Popular, Pedro Puy, saudou o "optimismo" mostrado pola ministra nunha entrevista concedida este domingo á Cadena Ser, aínda que criticou que o Executivo central teña "poucas actuacións concretas".

Fronte a iso, o popular insistiu en que é "fundamental" aprobar "canto antes" o Estatuto do Consumidor Electrointensivo que dea "garantías e estabilidade" tamén a outras compañías como Ferroatlántica. "Esperamos que se actúe coa necesidade de evitar males maiores", apostilou, pedindo tamén "que se teñan en conta" as suxestións da Xunta no conflito.

Pola súa banda, o portavoz de En Marea, Luís Villares, asegurou que a súa formación só será optimista cando "apareza publicada unha solución" para as plantas. "Quedaremos tranquilos cando saibamos que hai en firme unha oferta enriba da mesa e, subsidiariamente, se iso non se produce, que Alcoa sexa intervida por parte do Estado como fai con outras empresas adquirindo o seu carácter público", defendeu.

O portavoz do partido instrumental tamén reclamou unha modificación da regulación do sector eléctrico para "garantir a supervivencia das electrointensivas" mediante un marcado de prezos estables.

Pola súa banda, a portavoz nacional do BNG, Ana Pontón, insistiu en que a "solución" para salvar os centos de traballos pasa por adoptar unha tarifa eléctrica galega, unha medida sobre a que PP e PSOE, tal e como criticou, puxéronse "de perfil", xa que só contou cos apoios dos nacionalistas e En Marea.

Pontón apuntou tamén á "decepción" que producen, afirmou, tanto as políticas do Goberno estatal como da Xunta, xa que "non foron capaces de plantar cara a Alcoa" e "recuaron" na posibilidade de que o Estado "se fixese cargo" da planta, dado que á multinacional "non lle interesa" investir nela.

"Estou convencida de que este escenario non o veriamos en Euskadi, e aquí pasa porque temos unhas forzas políticas que no canto de defender os intereses dos galegos, parece que están máis interesados en defender os intereses das eléctricas e o interese centralista do Estado, que vai en contra do futuro do noso país", aseverou a líder do Bloque.

CONSELLEIRO "DESAPARECIDO"

Fronte á postura de PP, En Marea e BNG, o portavoz parlamentario do PSdeG, Xoaquín Fernández Leiceaga, censurou que o responsable de Economía da Xunta, Francisco Conde, estea "desaparecido". "Temos unha situación paradoxal, quen máis ruído fai, que é o conselleiro da Xunta, á hora de buscar solucións, está desaparecido", manifestou.

Neste sentido, considerou que, a pesar das críticas, o Ministerio de Industria é "o único que está a traballar de verdade para buscar unha solución" que os socialistas galegos esperan que "chegue cando antes".

Así, asegurou que sería "perfecto" que Alcoa formase parte desta solución, aínda que sinalou que tamén sería positivo que "existan outros investidores que se fagan cargo da planta".

"En todo caso, creo que hai que alentar ao Ministerio para que faga este traballo canto antes", defendeu Leiceaga, que cualificou de "boa noticia" o "optimismo" mostrado por Reyes Maroto sobre o futuro das plantas de Alcoa.