Por Europa Press / Redacción | SANTIAGO DE COMPOSTELA | 14/02/2019 | Actualizada ás 15:05
O presidente da Xunta, Alberto Núñez Feijóo, mostrouse este mércores a favor de celebrar as eleccións xerais o próximo 26 de maio, de forma que coincidan coas municipais, autonómicas --noutras dez comunidades, sen incluír a Galicia-- e europeas, porque considera que facelas en abril "sería un malgasto e unha inxustificación" por parte do Goberno de Pedro Sánchez. Unha reflexión que fai logo de pedir, como o seu líder en Madrid, Pablo Casado, que convocara canto antes as eleccións sen que lle preocupara, ata ese momento, a data.
Preguntado respecto diso este xoves, tras a reunión semanal co seu Executivo, Feijóo cre que "a lexislatura está acabada" despois da non aprobación este mércores do proxecto de Orzamentos Xerais do Estado (PGE) para 2019 no Congreso. "A lexislatura está morta e queda saber xa a data do funeral", engadiu.
Ademais, o presidente do Goberno galego considera que convocar os comicios para o 28 de abril, segundo transcendeu tras tombarse as contas na Cámara baixa, é "incompatible" coa "estabilidade" do país e algo "inédito" na democracia española. Deste xeito, o líder do PP de Galicia coincide coa postura do presidente nacional, Pablo Casado, de reclamar un 'superdomingo' electoral para o 26 maio.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.