Podemos e EU apoian a Anova para "reforzar" a coalición, sen contar con En Marea
Apostan por que "Galicia sexa un muro de contención da tripla alianza das dereitas".
- Villares descarta unha coalición como a defendida por Anova, EU e Podemos, porque sería repetir "erros"
- Anova prevé dialogar con EU e Podemos para concorrer ás xerais, pero elude a En Marea
Por E.P. | SANTIAGO DE COMPOSTELA | 16/02/2019 | Actualizada ás 16:33
Podemos Galicia e Esquerda Unida apostan por reforzar a proposta de unidade popular e os acordos que adoptaron xunto con Anova en 2015, que lles levaron a concorrer as eleccións xerais en coalición, pero faríano agora á marxe de En Marea, que lidera Luís Villares e que controla a marca pola que se presentaron.
Unha confirmación que chegou pouco despois de que á primeira hora deste sábado, Anova comunicase que iniciaba un proceso de diálogo con EU e Podemos, e sen citar en ningún momento a En Marea, para reforzar un proxecto de "unidade popular" en Galicia de face ás eleccións xerais do 28 de abril.
Tras isto, Podemos Galicia remitiu un comunicado no que alude a que "bai tres anos" construíron "unha alternativa plural para recuperar a democracia", cunha "alternativa de coalición e suma" que permitiu a Galicia ter unha "representación e interlocución inédita ata o momento".
En 2015, a coalición, baixo o nome de En Marea, obtivo seis deputados no Congreso, que baixaron a cinco nos seguintes comicios. Pero ante o adianto electoral e a convocatoria de eleccións para o 28 de abril, Podemos Galicia "inicia o diálogo" coas tres mesmas forzas e coas mareas municipalistas, para impulsar, de novo, a "coalición electoral".
A formación que en Galicia lidera Antón Gómez-Reino, Podemos Galicia, sinala así que inicia o "diálogo cos aliados" cos que construíu "ferramentas de maiorías no país".
Á súa vez, alerta da "ameaza" da "extrema dereita" aos dereitos das mulleres, o autogoberno ou o estado de Benestar e reivindica o "traballo feito ata aquí polo grupo de Marea no Congreso, que situou os "problemas da xente na axenda pública".
Reivindica, así mesmo, medidas políticas como a subida de 900 euros do Salario Mínimo Interprofesional ou a revalorización das pensións, como "exemplo de incorporación dunha nova axenda social".
ESQUERDA UNIDA APOSTA POR REFUNDAR A UNIDADE POPULAR
E na mesma liña tamén se pronunciou Esquerda Unida, que fala directamente de "refundar a unidade popular en Galicia" para que o espazo "sirva realmente" como motor tamén dos espazos municipalistas.
Esquerda Unida "aposta claramente polo diálogo fraterno" coas outras forzas de esquerdas que "deron luz á confluencia dos anteriores procesos" e á "intelixencia e pluralidade das diversas propostas locais".
O adianto electoral das xerais e a celebración dos comicios municipais o 26 de maio, "obriga" a definir e concretar a actuación política de EU , que "non pode ser outra" que a declaración de Mazarelos, de 2015.
Esquerda Unida confirma así que "comeza xa os contactos" cos espazos políticos cos que traballou desde a creación de AGE e coas candidaturas municipalistas para que "Galicia sexa tamén un muro de contención da tripla alianza das dereitas que ameaza cun programa ultra neste proceso electoral".
