Todos os partidos de Santiago e Lugo únense para esixir ao Ministerio que rectifique e cree novos xulgados do Social

Todas as forzas políticas dos concellos de Santiago de Compostela e Lugo expresaron a súa desconformidade coa decisión do Ministerio de Xustiza de non autorizar a creación de novos xulgados do Social na capital galega e na cidade das Murallas, tal e como solicitaran de maneira conxunta a Xunta e o Tribunal Superior de Xustiza de Galicia (TSXG) ao Goberno central.

Na tarde do xoves, horas despois de coñecerse a noticia, o pleno do Concello de Santiago aprobou por unanimidade unha declaración institucional na que a corporación santiaguesa expresa o seu "rexeitamento" á decisión do Ministerio de Xustiza, que non inclúe os xulgados do Social para Lugo e Santiago entre as novas unidades xudiciais autorizadas para Galicia.

Pola súa banda, o Concello de Lugo seguirá os pasos da capital galega e, segundo confirmou este venres a alcaldesa, Lara Méndez, promoverá outra declaración institucional para reclamar a creación dun xulgado do Social na capital provincial.

O seu homólogo santiagués, Martiño Noriega, remitiu unha carta dirixida á ministra de Xustiza, Dolores Delgado, na que a convida a reconsiderar a súa decisión e revogar a denegación do órgano xudicial para Santiago, "capital de Galicia e centro dunha área metropolitana de case 200.000 habitantes".

Nela, ademais de achegar a declaración institucional apoiada por Compostela Aberta, PP, PSOE e BNG, o rexedor lembra que o consistorio compostelán "estivo demandando a creación de novos servizos xudiciais durante anos para aliviar o atasco que existe nas salas existentes".

"Na nosa cidade existe unha posición común e unánime, tanto do conxunto da corporación como do Colexio de Avogados e o Goberno galego, para a implementación dunha cuarta sala do social, que evite que os expedientes acumulen atrasos de ata tres anos", reza a misiva enviada ao Ministerio de Xustiza.

Martiño Noriega cualificou como "insólita" a decisión adoptada por Xustiza, xa que a demanda para a capital galega fora pactada polo TSXG e a Xunta.

Pola súa banda, a alcaldesa de Lugo, Lara Méndez, insistiu en que o seu goberno "vai defender e reivindicar" o que necesita Lugo "para que sexa unha cidade de futuro" e "teña servizos". O primeiro paso será, segundo confirmou, promover na xunta de portavoces do próximo luns unha declaración institucional para expresar o rexeitamento da corporación luguesa á decisión de Xustiza.

Neste sentido, considera que o xulgado do Social que descarta o Ministerio para a súa urbe é "desde logo necesario e importante" para a cidadanía, xa que permitiría proporcionar "protección mesmo dos elos máis débiles da cadea". Méndez confía en que todos os grupos apoien a declaración.

RUEDA

O vicepresidente da Xunta, Alfonso Rueda, destacou que a proposta trasladada ao Ministerio de Xustiza está "acordada" co Tribunal Superior de Xustiza de Galicia e é "prioritaria".

Rueda destacou que a proposta trasladada polo Goberno galego saíu da comisión mixta de xustiza, na que participa a Administración autonómica e o TSXG, un órgano que foi convocado para o vindeiro luns, día 25 de xaneiro.

Lamentou que agora a xustiza galega se atope cunha "decisión non explicada". Neste sentido e tras deixar claro que "os datos non variaron", informou de que a comisión mixta volverá facer o informe para enviar ao Ministerio. "E volveremos pedir, se é que da reunión do luns volve saír ratificada a proposta, que se entre en razón".

"Son moitas as necesidades da Xustiza e, se houbese a necesidade de crear máis órganos, nós creariamos máis, pero se só son tres, os tres máis prioritarios son estes", apuntou.